Nashik News : नाशिक जिल्ह्यातील कसमादे पट्टा कांदा उत्पादनात आघाडीवर आहे. मात्र लेव्हीच्या मुद्द्यावर व्यापारी व हमाल मापाऱ्यांच्या वादामध्ये बाजार समितीचे कामकाज सध्या अडचणीत सापडल्याची स्थिती आहे. या पार्श्‍वभूमीवर बागलाण तालुक्यातील ढोलबारे येथे गुरुवारी (ता. २) खासगी कसमादे शेतकरी कृषी उत्पन्न बाजार समिती सुरू करण्यात आली असून, पहिल्या दिवशी ८० वाहनांचा लिलाव करून रोख स्वरूपात मोबदला देण्यात आला.

जवळपास २० व्यापारी येथे खरेदीसाठी असल्याची माहिती संचालक सुरेश पवार यांनी दिली. येथे किमान ३०० ते कमाल २३५१ रुपये दर मिळाला. तर सरासरी दर १५०० रुपये प्रतिक्विंटल मिळाला. खासगी कसमादे शेतकरी कृषी उत्पन्न बाजार समितीचे सुरेश पवार, गोदावरी पवार, गणेश पवार यांनी श्रीफळ अर्पण करून उन्हाळी कांदा लिलावाचा प्रारंभ केला.

कांदा उत्पादक शेतकऱ्यास येथील आवारात मोफत पाणी, चहा व नाश्ता देण्यात येणार आहे. ४० रुपयांत जेवणाची व्यवस्था करण्यात आली आहे. त्याच पद्धतीने शेतकरी, वाहनचालक व व्यापारी यांना वेळप्रसंगी आराम व मुक्कामाची सोय करण्यात आली आहे. स्थानिकांसह बाहेरील व्यापारीही येथील कांदा लिलावात भाग घेऊन शकतील, असे त्यांनी सांगितले.

या वेळी प्रगतिशील शेतकरी कृष्णा भामरे, भाऊसाहेब अहिरे, मधुकर साळवे, पांडुरंग पवार, मोहन भामरे, नीलेश कापडणीस, गणेश पवार, रमेश पवार, राकेश पवार, प्रशांत बोरसे, काशीनाथ नंदन, सुनील गवळी, शाम अहिरे, ज्ञानेश्वर देवरे, दिलीप भामरे, रावसाहेब ठोंबरे, भिला ठोंबरे, प्रदीप कांकरिया, सनी शर्मा, प्रमोद निकम, नीलकंठ निकम, प्रमोद अहिरे, मोठाभाऊ देवरे, साहेबराव पगारे, शरद भामरे, वसंत भामरे, केवळ देवरे, राहुल कदम, चेतन वाघ, कन्हैया माळी

पोपट जाधव, प्रवीण अहिरे, बापू महाजन, अप्पा कापडणीस, जालिंदर देवरे, कसमादे परिसरासह शेतकरी उपस्थित होते. शेतकरी संघटनेचे शैलेंद्र कापडणीस यांनी मनोगत व्यक्त केले.