Kolhapur Devsthan Land : नुकताच राज्य शासनाने मराठवाड्यातील देवस्थानांच्या वर्ग-२ च्या जमिनी वर्ग-१ करण्याचा निर्णय घेतला आहे. त्यानुसार संपूर्ण राज्यासाठी कायदा करून देवस्थान इनाम जमिनी कसणाऱ्या या संबंधित शेतकऱ्याच्या नावावर कराव्यात, यासह विविध मागण्यांचे निवेदन अखिल भारतीय किसान सभेच्यावतीने काल(ता.२३) जिल्हा प्रशासनाला देण्यात आले.

राज्य उपाध्यक्ष डॉ. उदय नारकर यांच्या नेतृत्वाखालील शेतकऱ्यांच्या शिष्टमंडळाने निवासी उपजिल्हाधिकारी संजय तेली यांची भेट घेऊन निवेदन सादर केले.

निवेदनातील मागण्या अशा, देवस्थान इनाम जमिनीच्या सात-बारावर कसणाऱ्या शेतकऱ्यांची नावे पूर्वीप्रमाणे समाविष्ट करावीत, तसेच त्यांची वारसा नोंद करण्यात यावी, यावर्षी जिल्ह्यामध्ये झालेल्या अतिवृष्टीच्या पार्श्वभूमीवर ओला दुष्काळ जाहीर करावा.

यामध्ये नुकसानग्रस्त शेतकऱ्यांना शंभर टक्के नुकसान भरपाई मिळावी व त्यांचे पीक कर्ज माफ करावे, राज्य शासनाने जाहीर केलेली शेती पंपासाठीची वीज बिल माफीची योजना ‘एचपी’ची कोणतीही अट न लावता सरसकट सर्व शेतकरी व सहकारी पाणीपुरवठा संस्थांना लागू करावी, सर्व खंडकरी शेतकऱ्यांचा खंड भरून घेण्यात यावा.

सर्व देवस्थान शेतकऱ्यांना पूर्वीप्रमाणेच जिल्हा मध्यवर्ती बँक व सर्व राष्ट्रीयीकृत बँका यांच्या माध्यमांतून पीक कर्ज मिळावे, देवस्थान जमीनधारक शेतकऱ्यांना पी. एम. किसान योजना व इतर सर्व शासकीय योजनांचा लाभ मिळावा, प्रस्तावित शक्तिपीठ महामार्ग पूर्णपणे रद्द करण्यात यावा.

जिल्ह्यामध्ये नवीन रस्ते व पूल बनविताना नदीपात्रालगत भराव टाकण्याऐवजी पिलर बांधून करावे, साखर निर्यातीवरील बंदी हटवण्यात यावी आणि इथेनॉल निर्मितीस प्रोत्साहन द्यावे, गेल्या वर्षी तुटलेल्या उसाला रुपये शंभर रुपयांप्रमाणे दुसरा हप्ता मिळावा अशा मागण्या करण्यात आल्या.

शिष्टमंडळात उमेश देशमुख, दिनकर आदमापुरे, आप्पा परीट, चंद्रकांत कुरणे, बाळासाहेब कामते, लक्ष्मण पाच्छापुरे, शिवाजी गुरव, नारायण गायकवाड, विलास पाटील, युवराज भोसले, तुळसाराम पाटील, भीमराव देसाई, संभाजी मोहिते, आदींचा समावेश होता.