Pune News: कृषी विभागात सर्वाधिक मलईदार समजल्या जाणाऱ्या निविष्ठा व गुणनियंत्रण विभागात १५ वर्षांपासून ठाण मांडून पुन्हा दक्षता पथकात उपसंचालकपदी बढती मिळविणारे उपसंचालक किरण श्‍यामराव जाधव यांना अखेर पथकातून हटविण्यात आले आहे. त्यांना हटविण्याची शिफारस आवटे समितीने केली होती.

गुणनियंत्रण कामकाजातील खाचाखोचा माहीत असलेले श्री. जाधव यांना वर्षानुवर्षे ‘गुणनियंत्रण’मध्ये ठेवण्यात वरिष्ठ अधिकारी तसेच निविष्ठा लॉबीकडून पाठिंबा मिळत गेला. हजारो कोटींची उलाढाल असलेल्या खत उद्योगाला परवाना देणारा कक्ष कृषी आयुक्तालयात आहे.

या कक्षात बदली होण्यासाठी राज्यभरातून लॉबिंग होत असते. परंतु जाधव यांना या कक्षाची सूत्रे सहज मिळालीच; शिवाय बढती मिळेपर्यंत ते ‘गुणनियंत्रण’संबंधी पदांवर कार्यरत होते. दक्षता पथकात थेट उपसंचालक झाल्यानंतर देखील ‘गुणनियंत्रण’चे अधिकार जाधव यांच्याकडे होते. या पथकाला कुठेही धाडी टाकण्याचे तसेच तपासणीचे अधिकार होते. त्यामुळे जाधव यांचा राज्यभर दबदबा तयार झाला.

जाधव यांच्या विरोधात पहिली उघड तक्रार आमदार सुरेश धस यांनी केली. ‘‘परवाना वाटपात जाधव यांनी संशयास्पद कामे केली. सरकारी सेवेत राहून नातेवाइकांच्या नावे कंपन्या स्थापन केल्या. या कंपन्यांना कृषी खात्याचे अनुदानदेखील मिळवले. त्यामुळे त्यांना निलंबित करावे व विशेष तपास पथकामार्फत (एसआयटी) त्यांची चौकशी करावी,’’ अशी मागणी आमदार धस यांनी केली होती.

तसेच जाधव यांच्यासह कृषी सहसंचालक प्रमोद लहाळे व जिल्हा अधीक्षक कृषी अधिकारी शंकर तोटावार यांना निलंबित करण्याबाबत मुख्यमंत्र्यांना पत्रदेखील दिले होते. अलीकडेच श्री. धस यांनी या अधिकाऱ्यांचे नाव घेत विधिमंडळात जाहीर केले. त्यात देखील जाधव यांचा उल्लेख होता. त्यामुळे कृषी विभागाने अखेर जाधव यांना दक्षता पथकातून हटविले आहे, अशी माहिती सूत्रांनी दिली.

कृषी आयुक्तालयाच्या एका वरिष्ठ अधिकाऱ्याने सांगितले, की जाधव यांच्यावर कोणतीही कारवाई केलेली नाही. त्यांना आता केवळ सोलापूरचे आत्मा प्रकल्प उपसंचालक म्हणून काम करण्यास सांगण्यात आले आहे. त्यांची चौकशी सुरू झाल्यानंतर गेल्या काही दिवसांपासून दक्षता पथकाच्या नियमित कामकाजात ते भाग घेत नव्हते. त्यांचे वरिष्ठ व दक्षता पथकाचे प्रमुख गोविंद मोरे यांना यापूर्वीच हटविले आहे. या गोंधळात आता दक्षता पथकाचे तीन-तेरा वाजले आहेत.

भ्रष्टाचाराचे पुरावे असूनही केवळ बदली

कृषी उपसंचालक किरण जाधव पदाचा गैरवापर करीत आर्थिक मागणी मागतात, अशा तक्रारी अनेक अधिकाऱ्यांनी केल्या आहेत. मात्र प्रत्यक्षात आवटे समितीसमोर जाधव यांच्याविरोधात लाचखोरीबाबत केवळ दोन अधिकाऱ्यांनी स्पष्ट लेखी जबाब दिले. आवटे समितीचा अहवाल, जाधव पैसे मागितल्याचे ऑडिओ रेकॉर्डिंग व त्यांच्या कार्यालयातील व्हिडिओ रेकॉर्डिंग तसेच दोन अधिकाऱ्यांचे लेखी जबाब इतके भक्कम पुरावे असूनदेखील जाधव यांच्यावर कारवाई करण्यात आलेली नाही. कृषी आयुक्तालयाने केवळ त्यांच्या बदलीची शिफारस केली असून ती संशयास्पद आहे. त्यामुळे भ्रष्ट पार्श्‍वभूमी असलेल्या जाधव यांच्या गॉडफादरची चौकशी व्हावी, असा सूर आता आयुक्तालयातील अधिकाऱ्यांनी लावला आहे.