Pune News : फूल उत्पादक शेतकऱ्यांना दिवाळीनिमित्त बाजारात चांगले दर मिळत आहेत. दिवाळीतील लक्ष्मीपूजन आणि पाडवा या महत्त्वाच्या दोन सणांसाठी पुणे बाजार समितीमधील फुलबाजार झेंडू, शेवंतीसह विविध प्रकारच्या विविधरंगी फुलांनी फुलला आहे.

राज्यातील फूल उत्पादक शेतकरी गणशोत्सव, नवरात्र, दसरा दिवाळी या सणांसाठीचे नियोजन करून, फुलांची लागवड करत असतात. यंदाच्या हंगामात लांबलेल्या मॉन्सूनचा परिणाम फूल उत्पादनावर झाला. यामुळे चांगल्या दर्जाच्या फुलांचे दर टिकून राहिले होते. विविध हंगामात महत्त्वाच्या असलेल्या झेंडू, शेवंतीच्या फुलांचे दर अनुक्रमे सरासरी १०० ते २५० रुपयांपर्यंत टिकून राहिले.

दिवाळीसाठीच्या फुलांची ग्राहक आणि हार आणि फूल व्यावसायिकांकडून मागणी मंगळवारपासून (ता. २९) सुरू झाली. यानिमित्ताने पुणे जिल्ह्यातील बारामती, इंदापूर, दौंड, यवत, माळशिरज, जुन्नर, खेड, आंबेगाव, शिरूर या भागांमधून तर नगर, सातारा, धाराशिव, हिंगोली, मोहोळ, सोलापूर, बीड, तसेच कर्नाटकातूनही फुलांची आवक होत होती. या फुलांना पुणे शहरासह, उपनगरे आणि कोकणातील काही भागांतून मागणी वाढली होती.

गुरुवारी (ता. ३१) बाजार समितीतील फुलांचे किलोचे भाव

झेंडू ५० ते १२० रुपये

शेवंती ६० ते २५० रुपये

कापरी ५० ते १२० रुपये

ॲस्टर सुट्टा १५० ते २५० रुपये

गुलछडी ३०० ते ५०० रुपये