Pune News : राज्याच्या कृषी विभागात अधिकाऱ्यांच्या भरतीसंदर्भात दाखल झालेल्या याचिका उच्च न्यायालयाने फेटाळल्या आहेत. त्यामुळे महाराष्ट्र लोकसेवा आयोगाने शिफारस केलेल्या ४१७ उमेदवारांची भरती करण्यासाठी हालचाली सुरू झाल्या आहेत.

कृषी आयुक्तालयाच्या सूत्रांनी सांगितले, की भरतीसंदर्भात अडचणीच्या ठरणाऱ्या याचिका न्यायालयात गेल्या होत्या. परंतु, आता न्यायालयाच्या भूमिकेतील अडथळे दूर झाले आहे. न्यायालयाचे निकाल हाती येताच तसेच राज्य शासनाकडून योग्य सूचना प्राप्त होताच भरतीची अंतिम प्रक्रिया पार पडू शकते.

महाराष्ट्र लोकसेवा आयोगाकडून ४१७ उमेदवारांची निवड कृषी अधिकाऱ्यांच्या विविध संवर्गासाठी केली होती. परंतु, रखडलेल्या भरतीचा तिढा सुटण्यासाठी कृषिमंत्री धनंजय मुंडे यांचेही प्रयत्न सुरू होते.

भरतीची प्रक्रिया पार पडल्यानंतर राज्याच्या कृषी विभागात उपसंचालक (गट अ), तालुका कृषी अधिकारी (गट ब) व मंडळ कृषी अधिकारी (गट ब कनिष्ठ) या पदांवर नवे अधिकारी नियुक्त होतील. भरतीची प्रक्रिया गेल्या दोन वर्षांपासून रखडल्यामुळे उमेदवार हैराण झाले होते. काही जणांनी कुटुंबाला आधार देण्यासाठी खासगी कंपन्यांमध्ये सेवा स्वीकारली. ही समस्या कृषिमंत्र्यांच्या कानावर जाताच त्यांनी न्यायालयीन प्रकरणाचा निपटारा होण्यासाठी प्रयत्न केले.