Dhananjay Munde : अतिवृष्टी बाधितांना निकषांपलीकडे मदत देऊ : कृषिमंत्री धनंजय मुंडे

Parbhani News : अतिवृष्टीमुळे परभणीसह मराठवाड्यातील बीड, नांदेड आदी जिल्ह्यांतील पिकांसह जमिनी खरडून गेल्या. शेतकऱ्यांचे अभूतपूर्व नुकसान झाले आहे. त्यामुळे बाधित शेतकऱ्यांना एनडीआरएफ व एसडीआरएफच्या निकषांपलीकडे मदत देण्याचा शासनाचा प्रयत्न राहील. बाधित शेतकऱ्यांच्या पदरात जास्तीत जास्त आर्थिक मदत पडावी यासाठी सर्वतोपरी प्रयत्न करणार आहोत, अशी ग्वाही कृषिमंत्री धनंजय मुंडे यांनी दिली.

कृषिमंत्री मुंडे यांनी बुधवारी (ता. ४) परभणी जिल्ह्यातील काष्टगाव, एकरुखा (ता. परभणी), कोल्हा (ता. मानवत), ढेंगळी पिपळगाव (ता. सेलू), रेणापूर, बोरगव्हाण, खेर्डा (सर्व ता. पाथरी) येथे अतिवृष्टीमुळे नुकसान झालेल्या पिकांची पाहणी केली. तसेच शेतकऱ्यांशी संवाद साधला. शेतकऱ्यांच्या व्यथा जाणून घेतल्या.

काष्टगाव (ता. परभणी) येथील नुकसानीची पाहणीस आले असता श्री. मुंडे यांना अतिवृष्टीमुळे वाळलेल्या कपाशीचे झाड देऊन स्वागत करण्यात आले. बाधित शेतकऱ्यांना तत्काळ सरसकट एनडीआरएफ, एसडीआरएफच्या निकषानुसार मदत करावी. पीकविमा कंपनीला अग्रिम विमा रक्कम देण्यासाठी आदेशित करावे, अशी मागणी शेतकऱ्यांनी केली.

श्री. मुंडे म्हणाले, की परभणी जिल्ह्यातील सर्व मंडलांतील शेतकऱ्यांना २५ टक्के अग्रिम विमा रक्कम देण्यासाठी जिल्हा प्रशासनाने अधिसूचना काढावी. वीज नाही. नेटवर्क नसल्यामुळे मोबाइलवर ऑनलाइन तक्रारी करणे शक्य नाही. त्यामुळे ऑफलाइन तक्रारी स्वीकारण्याचे आदेश काढण्याबाबत सूचना केल्या आहेत. पंचनामे सुरू करण्यात आले आहेत. या वेळी आमदार राजेश विटकेर, आमदार मेघना बोर्डीकर आदी उपस्थित होते.