Solapur News : जिल्हा मध्यवर्ती सहकारी बँकेचे मुख्य कार्यकारी अधिकारी विलास देसाई यांनी राजीनामा दिल्याने हे पद रिक्त झाले आहे. रिक्त झालेल्या जागेवर जुलै अखेरपर्यंत नवीन मुख्य कार्यकारी अधिकारी मिळण्याची शक्यता आहे. बँकेनेही त्यासाठी प्रशासकीय कार्यवाही करण्यासाठी हालचाली सुरू केल्या आहेत.

मुख्य कार्यकारी अधिकारी देसाई यांची नियुक्ती तत्काळ रद्द करावी या संदर्भात सहकार विभागाने आदेश दिल्यानंतर जिल्हा बँकेच्या वतीने नवीन मुख्य कार्यकारी अधिकारी नियुक्त करण्यासाठी प्रक्रिया राबविण्यात आली होती.

नवीन मुख्य कार्यकारी अधिकारी निवडण्यासाठी सहकार विभागातील अधिकाऱ्यांची समिती तयार करण्यात आली होती. त्यामध्ये निवृत्त अपर निबंधक धनंजय डोईफोडे यांच्या अध्यक्षतेखाली समिती गठित करण्यात आली होती.

या समितीमध्ये विभागीय सहनिबंधक योगीराज सुर्वे, नाबार्डचे निवृत्त अधिकारी सुखटणकर व लेखापरीक्षक अमोल जगताप यांचा या समितीमध्ये समावेश होता. या पदासाठी अर्ज केलेल्या व पात्र ठरलेल्या उमेदवारांच्या मुलाखती या समितीने घेतल्या होत्या.

या मुलाखतीमधून राजेंद्र शिंदे यांची मुख्य कार्यकारी अधिकारीपदासाठी शिफारस केली होती. राजेंद्र शिंदे यांच्या नियुक्तीसाठी जिल्हा बँकेला रिझर्व्ह बँक ऑफ इंडियाची परवानगी घेणे आवश्यक आहे. नवीन मुख्य कार्यकारी अधिकारी नेमण्यासाठी आवश्यक प्रक्रिया पूर्ण करण्यासाठी पंधरा दिवसांचा कालावधी लागण्याची शक्यता आहे.