Sangli / Kolhapur News : शेतकऱ्यांना सिंचनासाठी दिवसा वीज पुरवठा करण्यासाठी मुख्यमंत्री सौर कृषी वाहिनी योजना २.० राबविण्यात येत आहे. कोल्हापूर परिमंडल अंतर्गत येणाऱ्या कोल्हापूर जिल्ह्यात ९ तर सांगली जिल्ह्यात ११ प्रकल्प सुरु झाले आहेत.

या प्रकल्पांची एकूण स्थापित क्षमता १०२ मेगावॅट झाली असून एका वर्षात दोन्ही जिल्ह्यातील ३४ हजार १६१ शेतकऱ्यांना शेतीसाठी दिवसा वीज पुरवठा सुरु झाला आहे, अशी माहिी महावितरणाच्या सूत्रांनी दिली.

कृषी वाहिन्यांना सौर ऊर्जेद्वारे निर्माण केलेल्या विजेचा पुरवठा करण्यासाठी केंद्र सरकारच्या पीएम कुसुम योजनेच्या आधारे मुख्यमंत्री सौर कृषी वाहिनी योजना २.० राबविण्यात येत आहे.

सौर ऊर्जा निर्मिती प्रकल्पाच्या शृंखलेतील कोल्हापूर व सांगली जिल्ह्यातील हे २० प्रकल्प कार्यान्वित झाले आहेत. यामुळे कोल्हापूर जिल्ह्यातील २९ कृषी वाहिन्यांवरील (फिडरवरील) तर सांगली जिल्ह्यातील ३९ कृषी वाहिन्यांवरील (फिडरवरील) शेतकऱ्यांना दिवसा वीज पुरवठा सुरु झाला आहे.

कोल्हापूर जिल्ह्यातील स्थिती...

कोल्हापूर जिल्ह्यात ५४ ठिकाणी सौर प्रकल्प प्रस्तावित आहेत. या प्रकल्पांची एकूण क्षमता १७० मेगावॅट आहे. यापैकी नऊ प्रकल्प कार्यान्वित झाले असून यांची एकत्रित क्षमता ३२ मेगावॅट आहे. यामध्ये हरोली (३ मेगावॅट-१२३६ शेतकरी), आळते (४ मेगावॅट-१९२८ शेतकरी), सातवे (४ मेगावॅट-१२७० शेतकरी), किणी (२ मेगावॅट -१२१७ शेतकरी), हरळी बुद्रुक (३ मेगावॅट -१५५० शेतकरी), नरंदे-तासगाव (७ मेगावॅट- ३३२७ शेतकरी), कोळगाव (२ मेगावॅट- १०२६ शेतकरी), दुंडगे (७ मेगावॅट-१५८१ शेतकरी) या प्रकल्पांचा समावेश होतो. या प्रकल्पामुळे कोल्हापूर जिल्ह्यातील १३ हजार १३५ शेतकऱ्यांना शेतीकरता दिवसा वीज उपलब्ध झाली आहे.