Daund News: दौंड तालुक्याच्या पूर्व भागातील कांदा उत्पादक शेतकरी कांद्याच्या साठवणुकीसाठी पारंपरिक कुडाच्या कांदा चाळींपेक्षा मोठ्या आकाराच्या अत्याधुनिक कांदा चाळीस पसंती देऊ लागले आहेत.

दौंड तालुक्यात शेतकऱ्यांच्या सुबत्तेत वाढ करण्यात उसासारख्या नगदी पिकाने मोठा हातभार लावला आहे. याच जोडीला अलिकडच्या काळात पूर्व भागातील रावणगाव, खडकी, नंदीदेवी, मळद आणि स्वामी-चिंचोली परिसरातील शेतकरी गेल्या दहा वर्षांपासून मोठ्या प्रमाणावर कांदा पिकास पसंती देऊ लागले आहेत.

सिंचन सुविधांमुळे उसासह शेतकरी आता नगदी पीक असलेल्या कांदा उत्पादनाकडे वळाला आहे. यात खरीप आणि रब्बी अशा दोन्ही हंगामात कांदा पीक घेत असल्याने, कांदा साठवणुकीसाठी पारंपरिक कांदा चाळी कमी करत अत्याधुनिक कांदा चाळी उभारत आहेत.

बाजारातील चढ-उतारात कांदा साठवणुकीतून चांगला दर मिळविण्यावर शेतकऱ्यांचा भर आहे. यासाठी उन्हाळी कांद्याच्या साठवणुकीसाठी पारंपरिक कुडाच्या कांदा चाळींपेक्षा कांदा उत्पादक शेतकरी मोठ्या आकाराच्या अत्याधुनिक कांदा चाळीस पसंती देऊ लागले आहेत.

यासाठी सुमारे दोन ते तीन लाख रुपयांची गुंतवणूक कांदा उत्पादक शेतकऱ्यांना करावी लागत आहे.दौंड तालुक्यातील मोठे कांदा उत्पादक शेतकरी सोलापूर कृषी उत्पन्न बाजार समिती येथे, तर अल्पभूधारक शेतकरी दौंड-केडगाव कृषी उत्पन्न बाजार समितीकडे कांदा विक्रीसाठी पाठवत आहेत.