Buldhana News : खामगाव तालुक्‍यातील २१ गाव पाणीपुरवठा योजना तसेच खामगाव शहरासाठी वाढीव पाणीपुरवठा योजना प्रस्‍तावित असलेल्‍या शिर्ला नेमाने येथील मन प्रकल्‍पात उन्‍हाळ्याच्‍या सुरुवातीलाच अत्‍यल्‍प पाणीसाठा होता. मार्चच्‍या सुरुवातीला या प्रकल्‍पामध्ये २२ टक्‍के पाणी होते तर आता एका महिन्‍यात ७ टक्‍क्‍यांनी पातळी घटली असून सध्या १५ टक्के शिल्लक साठा असल्याची माहिती प्रकल्‍प अधिकाऱ्यांने दिली.

तालुक्यातील महत्त्वाचा असलेल्‍या शिर्ला नेमाने येथील मन प्रकल्पाच्या पाणीपातळीत यंदा पावसाळा संपण्याच्या मार्गावर असताना सुद्धा अपेक्षित वाढ झालेली नव्‍हती. त्‍यामुळे रब्‍बी हंगामासाठी पाणी मिळेल की नाही यासाठी परिसरातील शेतकरी चिंतीत होते. परंतु रब्‍बीसाठी काही भागात पाणी सोडण्यात आले.

पावसाळा सुरू होण्याआधी या प्रकल्पातील पाणीपातळी ही ४६ टक्के होती. तर पावसाळा संपताना प्रकल्पात ५३ टक्के पाणीसाठा होता. म्हणजे पावसाळ्यात यावर्षी प्रकल्‍पाच्‍या पाणीपातळीत केवळ ९ टक्केच वाढ झाली. सद्यस्‍थितीत प्रकल्‍पात केवळ १५ टक्‍के जलसाठा आहे. अद्याप उन्हाळा संपायला अडीच महिने शिल्लक आहेत.

या मन प्रकल्पावरून २१ गाव पाणीपुरवठा योजना कार्यान्वित करण्यात आली आहे. या योजनेअंतर्गत परिसरातील लाखनवाडा, आंबेटाकळी, शिर्ला, कंचनपूर, बोथा, बोरी अडगाव, आसा, दूधा, चिंचपूर, फतेपूर, गवंढाळा, उमरा, अटाळी, कदमापूर, घारोड, आकोली, जयराम गड, पेंडा, शहापूर अशा २१ गावांना पाणीपुरवठा करण्यात येतो. विशेष म्‍हणजे खामगाव शहरासाठी प्रस्‍तावित असलेली वाढीव पाणीपुरवठा योजनादेखील याच प्रकल्‍पावरून कार्यन्वित होणार असून, त्‍याचे काम पूर्णत्‍वास जात आहे.