Ratnagiri News : यंदा मॉन्सून लवकर परतल्यामुळे त्याचा परिणाम रब्बी हंगामावर झाला आहे. यंदा भाजीपाला, कडधान्य लागवड कमी झाली आहे. दरवर्षी साडेपाच हजार हेक्टरवर रब्बी हंगामात लागवड केली जाते; मात्र यंदा आतापर्यंत २ हजार ८५१ हेक्टरवर लागवड झाली आहे. याला जिल्हा कृषी विभागानेही दुजोरा दिला आहे.

कोकणात रब्बी पीक मोठ्या प्रमाणात घेतली जात नाहीत. पावसाळा संपला की भातकापणीला प्रारंभ होतो. नोव्हेंबरमध्ये पाण्याचा उद्भव असलेल्या ठिकाणी भाजीपाला, कडधान्य यासह भात लागवड केली जाते. उत्पन्नाचे साधन म्हणून याचा उपयोग करणारी कुटुंबे अत्यंत कमी होती; मात्र महिला बचत गट स्थापनेची मोहीम वेगाने राबविल्यानंतर रब्बी हंगामातील लागवडीचा उपयोग उत्पन्नाचे साधन म्हणून होऊ लागला आहे.

रब्बी हंगामातील क्षेत्र वाढीसाठी आत्मा योजनेमधून बियाणे किट वितरित केले जाते. काही ठिकाणी हिवाळ्यात वायंगणी शेती करतात. यंदा सप्टेंबरअखेरीस पाऊस थांबला. त्यानंतर अवकाळी पाऊसही मोजक्याच ठिकाणी नोंदला गेला.

पुढील दोन महिने उन्हाचा कडाकाही तेवढाच होता. त्याचा परिणाम भूगर्भातील पाणीपातळीवर होत असून अनेक ठिकाणी विहिरींची पातळी कमी झाली आहे. पाणी उपलब्ध नसल्यामुळे भाजीपाला लागवड कमी आहे. आतापर्यंत ५१ टक्के लागवड झाली आहे.

लागवडीखालील क्षेत्र

एकूण क्षेत्र ५ हजार ५९.९

लागवडीखालील २ हजार ८५१.९

टक्के ५६.३६

मका १.३१ हेक्टर

इतर तृणधान्य ३.१ हेक्टर

हरभरा ०

कडधान्य २७०४.७ हेक्टर

सूर्यफूल २.०२ हेक्टर

गळीतधान्य १४७.२६ हेक्टर