Nanded News : सप्टेंबरमधील अतिवृष्टीमुळे खरिपातील पिकांच्या नुकसानीबाबत लागू केलेल्या अधिसूचनेनुसार २५ टक्के विमा भरपाईची अग्रिम रक्कम शेतकऱ्यांना लवकरच मिळणार आहे. सोबतच मागील हंगामातील तक्रारीबाबत दिलेल्या आदेशाची अंमलबजावणी करण्याविषयी सक्त सूचना विमा कंपनीला दिल्या आहेत, अशी माहिती जिल्हाधिकारी अभिजित राऊत यांनी ‘ॲग्रोवन’शी बोलताना दिली.

नांदेड जिल्ह्यात ऑगस्टच्या शेवटच्या आठवड्यात व सप्टेंबरच्या पहिल्या आठवड्यात झालेल्या मुसळधार पावसामुळे खरिपातील जिरायती, बागायती व फळपिकांचे पाच लाख हेक्टरपेक्षा अधिक क्षेत्रावरील पिकांने ५० टक्क्यांपेक्षा अधिक नुकसान झाले होते. अतिवृष्टीमुळे जिल्ह्यातील अनेक नद्यांना पूर येऊन नदीकाठच्या जमिनी खरडून गेल्या होत्या.

या नुकसानीबाबत शेतकऱ्यांना भरपाई मिळावी, यासाठी जिल्हाधिकारी अभिजित राऊत अध्यक्ष असलेल्या जिल्हास्तरीय समितीने सर्व तालुक्यांसाठी प्रधानमंत्री पीक विमा योजना २०२४-२५ अंतर्गत हंगामातील प्रतिकूल परिस्थिती घटकातर्गत अधिसूचना लागू केली होती.

त्यामुळे समितीच्या सर्वेक्षण अहवालानुसार नांदेड जिल्ह्यातील सर्व तालुक्यांमध्ये पिकांच्या उत्पादनामध्ये ५० टक्के पेक्षा जास्त घट अपेक्षित आहे. त्यामुळे समितीने जिल्ह्यातील कापूस, सोयाबीन, तूर, ज्वारी या पिकांसाठी २५ टक्के परतावा देण्याचे निर्देशित केले होते. परंतु विमा कंपनीकडून अग्रिम रक्कम मंजूर करण्याबाबत कार्यवाही झाली नव्हती.

याबाबत जिल्हाधिकारी अभिजित राऊत यांनी विमा प्रतिनिधींशी मागील आठवड्यात बैठक घेतली. यात त्यांनी जिल्ह्यातील सर्व महसूल मंडळातील पात्र विमाधारक शेतकऱ्यांना नुकसानीच्या २५ टक्के अग्रिम रक्कम अदा करावे, तसेच मागील हंगामात शेतकऱ्यांनी नुकसानीबाबत विमा कंपनीकडे भरपाई मिळण्याबाबत तक्रारी केल्या होत्या. तक्रारीबाबत दिलेल्या आदेशाची अंमलबजावणी करण्याविषयी सक्त सूचना कंपनीला जिल्हाधिकारी राऊत यांनी दिल्या आहेत.