Ahilyanagar News: जूनच्या आधी कापसाची लागवड केली तर गुलाबी बोंड अळीचा प्रादुर्भाव होत असल्याने कापसाची लागवड १ जून नंतरच शेतकऱ्यांनी करावी या बाबत कृषी विभागाकडून दक्षता घेतली जात आहे. त्या पार्श्वभूमीवर यंदाच्या (२०२५-२६) हंगामासाठी कापसाच्या बियाणांची १५ मे नंतर शेतकऱ्यांना विक्री केली जाणार असल्याचे कृषी विभागाने स्पष्ट कले आहे.

राज्यात साधारण चाळीस लाख हेक्टरच्या जवळपास कापसाची लागवड केली जाते. हा आकडा दरवर्षी कमीजास्त होतो. प्रामुख्याने मराठवाडा, विदर्भासोबत आता पश्चिम महाराष्ट्रातही कापसाचे लागवड क्षेत्र वाढत आहे. राज्यात २०१७ मध्ये गुलाबी बोंडअळीचा प्रादुर्भाव मोठ्या प्रमाणात झाला होता.

त्यामुळे कापसाचे नुकसान झाले. शेतकऱ्यांना मोठा आर्थिक फटका बसला. त्यानंतर शासनाने २०१८ ते २०२४ या काळात गुलाबी बोंडअळीच्या प्रादुर्भाव कमी करण्यासाठी उपाययोजना केल्या. त्याचा एक भाग म्हणून १ जूनच्या आधी कापसाची लागवड होणार नाही याची काळजी घेतली.

२०२४-२५ च्या हंगामात प्रादुर्भाव बऱ्यापैकी कमी झालेला दिसला. कापूस शास्त्रज्ञांच्या मतानुसार गुलाबी बोंडअळीचा जीवनक्रम खंडित न झाल्याने प्रादुर्भाव वाढण्याचा धोका निर्माण होण्याची शक्यता असते. त्यामुळे यंदाही गुलाबी बोंडअळीला आळा घालण्यासाठी अनेक उपाययोजनांपैकी एक असलेल्या हंगामपूर्व कापूस लागवड होणार नाही याची कृषी विभाग काळजी घेत आह

त्यामुळे बियाणांची १५ मे नंतरच विक्री होणार असल्याचे जाहीर करण्यात आले असून १ जून नंतरच लागवड होईल याबाबत त्या-त्या भागातील कृषीच्या अधिकारी, कर्मचाऱ्यांनी कटाक्षाने काळजी घ्यावी, असे गुणनियंत्रण निविष्ठा संचालकांनी सांगितले आहे. निर्धारीत वेळेच्या आत बियाणांची विक्री केली तर कारवाई करणार असल्याचे सांगण्यात आले आहे.

असे आहे नियोजन

- १ मे ते १० मे ः उत्पादक कंपनी ते वितरक

- १० मे पासून ः वितरक ते किरकोळ विक्रेते

- १५ मे पासून ः किरकोळ विक्रेते ते शेतकरी

- प्रत्यक्ष लागवड ः १ जून नंतर