Jalgaon News : खानदेशात कापूस दरांवर दबाव असून, आवक सध्या प्रतिदिन २२ हजार क्विंटल आहे. शेतकऱ्यांना ६२०० ते ७००० रुपये प्रतिक्विंटल दर खेडा (थेट) खरेदीत मिळत आहे.

शासकीय कापूस खरेदी खानदेशात सुरू झाली आहे. परंतु शासकीय खरेदीला हवा तसा प्रतिसाद नाही. कारण खरेदी केंद्रात कापूस नेण्यासाठी वाहूतक भाडे द्यावे लागते. जाचक अटी व नियमही आहेत.

यामुळे शेतकरी खेडा खरेदीत कापसाची विक्री करणे पसंत करीत आहेत. कापसाची आवक सध्या प्रतिदिन २१ ते २२ हजार क्विंटलपर्यंत होत आहे. ही आवक मागील वर्षाच्या तुलनेत कमी आहे. मध्यंतरी आवक रखडत सुरू होती.

परंतु शासकीय खरेदी सुरू होताच खेडा खरेदीही सुरू झाली आहे. परंतु ही खरेदीदेखील रखडत सुरू आहे. कारण कापूस गावोगावी कमी आहे. उत्पादन कमी असल्याने आवक यंदा कमी असल्याची माहिती शेतकरी आणि व्यापाऱ्यांनी दिली.

कापसाची पाठवणूक मध्य प्रदेश, गुजरात व स्थानिक जिनिंग प्रेसिंग कारखान्यांत केली जात आहे. कारखानदार, मोठे व्यापारी एजंटच्या मदतीने खरेदी करीत आहेत. सध्या कापसाची आवक धुळ्यातील शिरपूर, नंदुरबारमधील शहादा भागात अधिक आहे. जळगाव जिल्ह्यात जळगाव, जामनेर भागांत आवक बऱ्यापैकी आहे. परंतु इतर भागांत आवक कमी आहे.

दरात वाढीची अपेक्षा

खानदेशात कापसाचे दर मागील पंधरवड्यातही ६२०० ते ७००० रुपये प्रतिक्विंटल, असे खेडा खरेदीत शेतकऱ्यांना मिळत होते. अजूनही अशीच स्थिती आहे. मागील काही दिवसांत दरात सुधारणाच झालेली नाही. यंदा कापसाचा दर्जा बरा आहे.

पण दर कमी मिळत असल्याने शेतकरी नाराज आहेत. किमान साडेआठ ते नऊ हजार रुपये प्रतिक्विंटलचा दर शेतकऱ्यांना हवा आहे. अनेक शेतकऱ्यांनी दरवाढीच्या प्रतीक्षेत कापसाची साठवणूक केली आहे.