Parbhani News : खरीप २०२५ हंगामात शुक्रवार (ता.२७) पर्यंत परभणी जिल्ह्यात २ लाख ८९ हजार ५ हेक्टर (५५.७४ टक्के) तर हिंगोली जिल्ह्यात २ लाख २२ हजार ५९९ हेक्टरवर (५४.२४ टक्के ) पेरणी झाली आहे. वाढीच्या अवस्थेतील पिकांमध्ये आंतरमशागतीची कामे सुरु आहेत. परंतु कमी पावसाच्या भागातील पेरण्या रखडलेल्या आहेत.

परभणी जिल्ह्यात ५ लाख १८ हजार ४६८ पैकी २ लाख ८९ हजार ५ हेक्टरवर पेरणी झाली. त्यात कपाशीची १ लाख ९१ हजार ९५४ पैकी १ लाख २४ हजार ४४६ हेक्टरवर (६४.८३ टक्के) लागवड झाली. सोयाबीनची २ लाख ५४ हजार ५४ पैकी १ लाख ४३ हजार ८५५ हेक्टरवर (५६.६२ टक्के), तुरीची ४२ हजार ६०२ पैकी १६ हजार ४७८ हेक्टर (३८.६८ टक्के) झाली आहे.

मुगाची १७ हजार ६०० पैकी २ हजार ७०७ हेक्टर ( १५.३८ टक्के), उडदाची ६ हजार ४१३ पैकी ९१३ हेक्टरवर (१४.२४ टक्के), ज्वारीची ३ हजार ८५७ पैकी २९१ हेक्टर (७.५६ टक्के), बाजरीची ४९९ पैकी २५ हेक्टर (५टक्के) पेरणी झाली. हिंगोली जिल्ह्यात २ लाख २२ हजार ५९९ हेक्टरवर (५४.२४ टक्के) पेरणी झाली.

त्यात कपाशीची २३ हजार ५३० हेक्टरवर लागवड झाली. सोयाबीनची १ लाख ६७ हजार ८६१ हेक्टर, तुरीची २३ हजार ७५० हेक्टर, मुगाची ३ हजार ९० हेक्टर, उडदाची २ हजार १६२ हेक्टर, ज्वारीची १ हजार ८०१ हेक्टरवर पेरणी झाली आहे. या दोन जिल्ह्यातील अनेक मंडलातील गावांमध्ये अद्याप पेरणी योग्य पाऊस झालेला नाही.

अनेक भागात पुरेशा ओलाव्याअभावी बियाण्याची उगवण झाली नाही. त्यामुळे शेतकऱ्यांना दुबार पेरणी करावी लागणार आहे. जमिनीत ओलावा कमी झाल्यामुळे वाढीच्या अवस्थेतील पिकांना पावसाची गरज आहे. मागील आठवड्यातील पावसामुळे पिकांना जीवदान मिळालेआहे.अद्याप पेरणी न झालेल्या भागातील शेतकऱ्यांना मोठ्या पावसाची प्रतिक्षा आहे.