ॲग्रोवन वृत्तसेवा

Amravati News : अमरावती : मोजमाप करताना वजन काटा रिमोटच्या साह्याने संचालित करीत शेतकऱ्याची फसवणूक करण्यात आल्याचा धक्कादायक प्रकार शिरखेड पोलिस ठाण्याच्या हद्दीत घडला. या प्रकरणी शेतकऱ्यांच्या तक्रारीवरून पोलिसांनी सहा जणांना अटक केली, तर चार जण फरार झाले. निंभी गावात ही घटना घडली.

शुभम नंदकुमार साबळे (वय ३०, रा. निंभी, ता. मोर्शी) यांच्या तक्रारीवरून संशयित तन्वीर अहमद मोहंमद जमीर (वय ४०, रा. बार्शीटाकळी, जि. अकोला), राजिक खान नूर खान (वय ४०), अलीमुद्दीन (वय ४५), गॅसूद्दीन (वय ४०), मोहंमद तजक्कीर मोहंमद जमीर (वय ३६), मनोहर श्रीराम भवाने (वय ५६), जाफर बेग जमीर बेग (वय ३०), अजीम नाजीम जामोद्दीन, योगेश प्रकाश वाठोडकर, सुनील महादेव घाटोळ.

अशी शेतकऱ्यांची फसवणूक करणाऱ्यांची नावे असल्याचे पोलिसांनी सांगितले. त्यापैकी सुनील महादेव घाटोळ यास अटक करण्यात आली. त्या सर्वांविरुद्ध शिरखेड पोलिसांनी गुन्हा दाखल केला आहे. सुनील घाटोळ हा निंभी गावातील एजंट आहे. त्या एजंटचा फोन शुभम साबळे या शेतकऱ्यास आला व कापूस विकत घेत असल्याचे सांगितले. सुनील आठ ते दहा जणांना सोबत घेऊन साबळे या शेतकऱ्याच्या घरासमोर आला.

सात हजार १५० रुपये प्रति क्विंटलप्रमाणे भाव ठरला. इलेक्ट्रॉनिक्स काट्याने साबळे यांच्या घरातील कापूस मोजला. जवळपास सहा क्विंटल कापूस मोजून संबंधितांनी वाहनात भरला. शेवटच्या टप्प्यात मोजमाप करीत असताना, साबळे या शेतकऱ्याला संशय आल्याने त्यांनी इलेक्ट्रॉनिक्स वजनकाट्याकडे दृष्टिक्षेप टाकला.

जो कापूस एजंटच्या इलेक्ट्रॉनिक्स वजन काट्यावर ७१ किलो भरला तोच शेतकऱ्याने स्वत:च्या वजनकाट्यावर मोजला असता ८६ किलो भरला. साबळे यांच्या मालकीचा आठ क्विंटल कापूस एजंटने वाहनात भरला होता. फसवणूक झाल्याचे लक्षात येताच साबळे यांनी आक्षेप घेऊन इतर शेतकऱ्यांना जागृत केले.

खेडा खरेदीत आमिष

सध्या बाजारात कापसाला ७००० ते ७१०० रुपये क्विंटल असा दर आहे. मात्र थेट गावात जाऊन खरेदी करणाऱ्या या व्यापाऱ्यांनी शेतकऱ्यांना ७१०० ते ७१५० रुपये प्रति क्विंटल असा दर दिला. वाढीव दराच्या आड वजन काट्यात हेराफेरी करत शेतकऱ्यांची फसवणूक केली जात असल्याचे या प्रकारामुळे उघड झाले आहे.