Nagpur News: राज्य सरकारकडून लाडकी बहीण योजनेसाठी दर महिन्याला हजारो कोटी रुपये खर्च केले जात आहेत. त्यामुळे सरकारी तिजोरीवर प्रचंड ताण पडला असताना राज्य सरकारने मागील तीन वर्षांपासून ९० हजार कोटी रुपयांची बिले थकवले आहे. त्यामुळे बांधकाम व्यावसायिक आर्थिक अडचणीत सापडले आहेत.

राज्य शासनाने कोट्यवधी रुपयांच्या कामांना मंजुरी दिली. कार्यारंभ आदेश मिळताच ठेकेदारांनीही जलद बिले मिळावीत म्हणून गतीने कामे केलीत. त्यासाठी बॅंकेकडून कर्ज घेतले. त्यातील सर्वाधिक कामे ही सार्वजनिक बांधकाम विभागाचीच आहेत. त्याखालोखाल जलजीवन मिशन, पाणीपुरवठा विभागाचे आहेत.

कंत्राटदारांना आता बँका आणि जीएसटी विभागाकडून नोटीस बजावल्या जात आहेत. याआधी असे कधी घडत नव्हते. देणी सहा ते सात महिन्यांत मिळत होती. परंतु, आता तीन वर्षांपासूनची देणी थकीत आहेत. यातच आता दीड लाख कोटी रुपयांची कामे सरकारने काढली आहेत. आधीचेच पैसे मिळालेले नाहीत. त्यात नवीन कामे प्रस्तावित करण्यात आल्याने अडचणी वाढणार आहेत.