Yavatmal News : वीज महावितरण (Mahavitaran) कंपनीने तुटीच्या भरपाईसाठी सरासरी २.५५ रुपये प्रतियुनिट अशा दरवाढीचा प्रस्ताव दाखल केलेला आहे. ही दरवाढ (Electricity Rate Hike) पूर्णपणे रद्द करण्यात यावी, या मागणीसाठी वीजग्राहक संघटना आक्रमक झालेली आहे.

या निर्णयाचा विरोध दर्शविण्यासाठी येत्या २८ फेब्रुवारीला वीजग्राहक संघटना वीज दरवाढीच्या प्रस्तावाची होळी करणार आहे.

महावितरणच्या दरवाढीला विरोध दर्शविण्यासाठी जिल्ह्यातून औद्योगिक, शेतकरी, ग्राहक संघटना व वीजग्राहक यांच्याकडून १५ फेब्रुवारीपर्यंत सूचना व हरकती दाखल करण्यात येणार आहे. वीजदरवाढीविरोधात जनजागृती केली जाणार आहे.

वीजदरवाढ रद्द करण्यासाठी लोकप्रतिनिधींना निवेदन दिले जाणार आहे. याशिवाय वीजदरवाढीला तीव्र विरोध दर्शविण्यासाठी येत्या २८ फेब्रुवारीला वीजदरवाढ प्रस्तावाची होळी केली जाणार आहे.

सध्याचे महावितरणचे दर सर्वाधिक आहे. त्यानंतरही दरवाढ ही सर्वसामान्य ग्राहकांना शॉक देणारी आहे. दरवाढीचा परिणाम येणाऱ्या उद्योगांवर होणार आहे. शेतकरी, कृषी अशा सर्वच क्षेत्राला त्याचा फटका बसणार आहे. त्यामुळे ही दरवाढ रद्द करावी, अशी मागणी वीजग्राहक संघटनेची आहे.

दरम्यान, येत्या २८ फेब्रुवारीला वीजदरवाढ प्रस्तावाची होळी करण्याच्या आंदोलनात नागरिकांनी मोठ्या संख्येने सहभागी व्हावे, असे आवाहन विदर्भ वीजग्राहक संघटनेचे प्रशांत दर्यापूरकर यांनी केले.