Mumbai News : कोकणात जैवविविधता विपुल प्रमाणात आहे. या जैवविविधतेचे संवर्धन करावे, असे आवाहन पालघर संशोधन केंद्राचे प्रा. सिद्धार्थ कदम यांनी केले. डॉ. बाळासाहेब सावंत कोकण कृषी विद्यापीठ, दापोली अंतर्गत वनस्पतीशास्त्र विभाग, कृषी विज्ञान केंद्र आणि कृषी विभाग डहाणू यांच्या संयुक्त विद्यमाने कोसबाड हिल येथे स्थानिक वाण संवर्धन आणि जैवविविधता प्रशिक्षण झाले. त्या वेळी ते बोलत होते.

बदलत्या हवामानात स्थानिक वाण तग धरू शकतात. अन्न आणि पोषण सुरक्षेसाठी ते महत्त्वाचे आहे. त्यांची निवड, संवर्धन, प्रसार आणि विक्री याबाबतीत सविस्तर माहिती डॉ. विलास जाधव यांनी दिली. डॉ. उदय पेठे यांनी स्थानिक वाणांचे गुणवैशिष्ट्ये आणि नोंदणीबाबत मार्गदर्शन केले.

डॉ. महेंद्र पालशेतकर यांनी स्थानिक वाण जतन करण्याच्या पद्धतीविषयी माहिती दिली. स्थानिक वाणांवरील कीड व रोग निर्मूलनासाठी कोणत्या उपाययोजना कराव्यात; याबाबत कृषी विज्ञान केंद्राचे शास्त्रज्ञ उत्तम सहाणे यांनी मार्गदर्शन केले. या वेळी वनस्पतीशास्त्र विभागप्रमुख डॉ. रमेश कुणकेरकर, विद्यापीठाचे सहयोगी अधिष्ठाता यांचे मार्गदर्शन मिळाले.