New Delhi News : भारताचे माजी पंतप्रधान चौधरी चरणसिंह यांच्या स्मरणार्थ २००२ मध्ये किसान दिवस साजरा करण्याची घोषणा करण्यात आली.

ज्यांनी शेतकरी ग्रामीण विकासासह देशाच्या विकासासाठी आपले आयुष्य समर्पित केले अशा महान व्यक्तीचा गौरव करण्यात आला आहे, असे प्रतिपादन उपराष्ट्रपती जगदीप धनखड यांनी सोमवारी (ता. २३) केले.

किसान दिवसानिमित्त दिल्ली येथील किसान घाट येथे चौधरी चरणसिंह यांच्या समाधिस्थळी उपराष्ट्रपती धनखड यांनी पुष्प अर्पण करून अभिवादन केले. या प्रसंगी ते माध्यमांशी बोलत होते. या प्रसंगी चौधरी चरणसिंह यांचे नातू आणि राष्ट्रीय लोक दलाचे प्रमुख जयंत चौधरी उपस्थित होते.

दरम्यान पंतप्रधान नरेंद्र मोदी यांनीही चौधरी चरणसिंह यांच्या जयंतीनिमित्त सोशल मीडियाद्वारे श्रद्धांजली अर्पण केली.

‘‘गरीब आणि शेतकरी यांचे खरे हितचिंतक माजी पंतप्रधान भारतरत्न चौधरी चरणसिंह यांच्या जयंतीनिमित्त विनम्र अभिवादन. देशाच्या प्रती समर्पण आणि सेवाभाव सदैव प्रेरणा देत राहील,’’ या शब्दांत त्यांनी सोशल मीडियाद्वारे व्यक्त केले.