ॲग्रोवन वृत्तसेवा
CCI Cotton जालना : येथील कृषी उत्पन्न बाजार समितीमध्ये ‘सीसीआय’च्या वतीने सुरू करण्यात आलेल्या कापूस खरेदी केंद्रात तसेच शहर परिसरातील जिनिंगमध्ये कापसाची आवक कमीच असल्याची स्थिती आहे. तर दुसरीकडे खासगी जिनिंगमध्ये कापूसदरही कमी मिळत असल्याची स्थिती आहे.

यंदा जालना जिल्ह्यात सुरुवातीला पावसाचे प्रदीर्घ खंड व त्यानंतर अखेरच्या टप्प्यात आलेल्या अवकाळी पावसामुळे कपाशीच्या पिकाचे मोठे नुकसान झाले.

अवकाळी पावसामुळे भिजलेल्या कापसाचे दर पडले तसेच चांगल्या कापसालाही आधी मिळत असलेल्या दराच्या तुलनेत कमीच दर मिळायला लागले. उत्पादनातही मोठ्या प्रमाणात घट येते आहे. त्याचा थेट परिणाम विक्रीसाठी येणाऱ्या कापसाची आवक घटण्यावर होताना दिसतो आहे.

जालना कृषी उत्पन्न बाजार समितीमध्ये ‘सीसीआय’च्या वतीने ११ डिसेंबरपासून कापूस खरेदीसाठी केंद्र सुरू करण्यात आले. या केंद्रावर बुधवारी (ता. २७) ४८५ क्विंटल ४० किलो कापसाची आवक झाली होती.

त्याआधी ११ ते २६ डिसेंबर या कालावधीत या केंद्रावर २८२४ क्विंटल ७० किलो आवक झाली होती. त्यामुळे या केंद्रावर एकूण आवक ३३१० क्विंटल १० किलो राहिली.

दुसरीकडे जालना शहर परिसरातील खासगी जिनिंगकडे १ एप्रिल ते २७ डिसेंबर या कालावधीत एकूण ५५४६ क्विंटल ११ किलो कापसाची आवक झाली. त्यामध्ये बुधवारी (ता. २७) आवक झालेल्या १२२ क्विंटल ४४ किलो व त्याआधी आवक झालेल्या ५४२३ क्विंटल ६७ किलो कापसाचा समावेश आहे.

खासगी जिनिंगमध्ये आवक झालेल्या कापसाला ५९६० ते ६९२५ रुपये प्रतिक्विंटल दरम्यान दर मिळाला. दुसरीकडे ‘सीसीआय’च्या वतीने खरेदी करण्यात आलेल्या कापसाचे दर ६७३९ ते ७०२० रुपये प्रतिक्विंटल दरम्यान राहिल्याची माहिती बाजार समितीच्या सूत्रांनी दिली.