Pune Development News : जिल्हा विकास आराखड्यासाठी (डिस्ट्रिक्ट स्ट्रॅटेजिक प्लॅन) सर्व संबंधित विभागांनी सर्वंकष बाबींचा समावेश करत माहिती उपलब्ध करून द्यावी, असे निर्देश नियोजन उपायुक्त संजय कोलगणे यांनी दिले.

पुणे जिल्ह्याचे जिल्हा सामाजिक व आर्थिक समालोचन २०२३ चे प्रकाशन वेळेत होण्याकरिता संबंधित कार्यान्वयीन यंत्रणांची बैठक जिल्हाधिकारी कार्यालय येथे विभागीय आयुक्त कार्यालयाचे उप आयुक्त (नियोजन) संजय कोलगणे यांच्या अध्यक्षतेखाली मंगळवारी (ता.२) झाले.

त्या वेळी जिल्हा विकास आराखड्याबाबतही चर्चा झाली. बैठकीस अर्थ व सांख्यिकी संचालनालय, पुणे प्रादेशिक कार्यालयाचे सहसंचालक हणमंत माळी, जिल्हा नियोजन अधिकारी किरण इंदलकर, जिल्हा सांख्यिकी कार्यालयाचे उपसंचालक संजय मरकळे आदी उपस्थित होते.

या वेळी जिल्हा विकास आराखड्याबाबत उप-आयुक्त(नियोजन) श्री. कोलगणे आणि जिल्हा नियोजन अधिकारी श्री. इंदलकर यांनी माहिती देत सादरीकरण केले. हा आराखडा तयार करतानाच्या विविध महत्त्वाच्या टप्प्यांची माहिती दिली.

यामध्ये डिस्ट्रिक्ट फॅक्ट शीट तयार करणे; त्याअनुषंगाने बलस्थाने, कमकुवतपणा, संधी आणि धोके अशा पद्धतीचे (एस.डब्ल्यू.ओ.टी.) विश्‍लेषण करण्यात यावे. आपापल्या विभागाच्या क्षेत्रातील विविध भागधारक शोधून व त्यांचा सहभाग आराखडा तयार करताना घेणे, महत्त्वाची ३ ते ४ क्षेत्र शोधून व्हिजन डॉक्युमेंट तयार करणे आदीबाबत सविस्तर माहिती देण्यात आली.