Ahilyanagar News : शेतकऱ्यांना दिवसा वीजपुरवठा व्हावा यासाठी मुख्यमंत्री सौरपंप योजनेतून अनुदानावर पंपसंच बसवले जातात. मात्र ते नादुरुस्त झाल्यावर सबंधित कंपनीकडून दुरुस्ती करण्याकडे दुर्लक्ष होत असल्याने अहिल्यानगर जिल्ह्यासह राज्यातील बहुतांश भागातील शेतकरी त्रस्त आहेत. सौरपंप दुरुस्त होत नसल्याने पिकांच्या नुकसानीला सामोरे जावे लागत आहे.

विजेच्या समस्येने शेतकरी त्रस्त आहेत. त्यामुळे विजेचा प्रश्न सुटावा आणि दिवसा वीजपुरवठा करता यावा, विजेसाठी होणारा खर्चही करता यावा यासाठी शासन मुख्यमंत्री सौरपंप योजनेतून अनुदान सौरपंप संच बसवले जात आहेत. जास्तीत जास्त शेतकऱ्यांनी या योजनेचा लाभ घ्यावा यासाठी शासनाकडूनही मागेल त्याला सौरपंप अशा संकल्पना राबवली जात आहे.

राज्यात आतापर्यंत लाखो शेतकऱ्यांनी सौरपंप संच बसवले आहेत. सर्वसाधारण प्रवर्गातील शेतकऱ्यांसाठी सौर कृषी पंप किमतीच्या १० टक्के रक्कम, तर अनुसूचित जाती-जमातींच्या शेतकऱ्यांसाठी सौर कृषी पंप किमतीच्या ५ टक्के रक्कम भरून सौर पंपाचा पूर्ण संच दिला जाणार आहे.

उर्वरित रक्कम राज्य व केंद्र सरकारकडून अनुदान स्वरूपात दिली जाते. संच बसवल्यावर त्यांच्या दुरुस्तीबाबत काही वर्ष सबंधित कंपनीकडे जबाबदारी असते. मात्र एकदा संच बसवले की कंपनीकडून पुन्हा दुरुस्तीबाबत दखलच घेतली जात नाही. बंद पडलेले सौर पंप दुरुस्तीसाठी कंपनीचे कोणतेही प्रतिनिधी मिळत नसल्याची तक्रार शेतकरी सातत्याने करत आहेत. मात्र त्याकडे दुर्लक्ष केले जात आहे.

याबाबत दाद कोठे मागायची याबाबतही शेतकरी अनभिज्ञ आहेत. सौरऊर्जेवर चालणारा विद्युतपंप असल्याने व अन्य पाणी उपसा करण्याबाबत साधने नसलेल्या शेतकऱ्यांना नुकसानीला सामोरे जावे लागत आहे.

मुख्यमंत्री सौरपंप योजनेतून अनुदान सौरपंप संच बसवले नादुरुस्त झाल्यावर पुन्हा दुरुस्ती होत नसल्याने शेतकतरी त्रस्त झाले आहेत.