Pune News : नीरा नदी धरण साखळीतील नीरा-देवघर, भाटघर, गुंजवणी व वीर या चार धरणांमध्ये गतवर्षीपेक्षा ८ टक्के पाणीसाठा कमी आहे. यावर्षी पाऊस कमी झाल्याने पाणीसाठा देखील कमी होत आहे. त्यात दुष्काळी तालुक्यांच्या यादीमध्ये भोरचा समावेश न केल्याने शेतकऱ्यांमध्ये नाराजी आहे.

तालुक्यातील चारही धरणांमधील ४९.१९ टीएमसी पाणीसाठ्यापैकी ४४.५७ टीएमसी पाणीसाठा शिल्लक आहे. गेल्या वर्षी १ नोव्हेंबरला चारही धरणांत १०० टक्के पाणीसाठा होता. परंतु या वर्षी वीर धरणात सर्वांत कमी ६१.७३ टक्के पाणीसाठा आहे.

त्याखालोखाल वेल्हे तालुक्यातील गुंजवणी धरणात ९७.५९ टक्के, भोर तालुक्यातील भाटघर धरणात ९९.७१ टक्के, तर नीरा-देवघर धरणात १०० टक्के पाणीसाठा आहे. गुंजवणी, भाटघर आणि नीरा-देवघर धरणांवरील वीजनिर्मिती केंद्रेही बंद आहेत.

शासनाने जिल्ह्यातील नीरा नदी धरण साखळीच्या पाण्यावर अवलंबून असलेले बारामती, पुरंदर, दौड, इंदापूर व शिरूर तालुक्यांचा समावेश गंभीर आणि मध्यम दुष्काळी तालुक्यात केला, मात्र भोरला त्यातून वगळल्याने शेतकऱ्यांमध्ये संताप आहे.

उन्हाळ्यात नीरा-देवघर व भाटघर धरणांमधील पाणी सोडल्यानंतर भोर तालुक्यातील गावांना पिण्यासाठी पाणी मिळत नाही. त्यामुळे यावर्षी पूर्वेकडील तालुक्यांना दुष्काळाचा निधी मिळेल. त्यामुळे त्यांना फक्त पिण्यासाठीचेच पाणी सोडावे, अशी अपेक्षा तालुक्यातील नागरिकांनी व्यक्त केली आहे.

नीरा-देवघर, भाटघर व वीर या धरणांमधील पाण्यामुळे पुरंदर बारामती व इंदापूर तालुक्यातील ३७ हजार ७० हेक्टर क्षेत्र सिंचनाखाली येत आहे. तर खंडाळा, माळशिरस, पंढरपूर व सांगोला या तालुक्यातील ६५ हजार ५०६ हेक्टर क्षेत्र सिंचनाखाली येत आहे.