Beed News : जिल्हा मध्यवर्ती सहकारी बँकेला कृषी व अकृषी कर्जपुरवठा सुरू ठेवण्यासाठी राज्य सहकारी बँकेच्या माध्यमातून ३०० कोटी रुपयांचे सॉफ्ट लोन सवलतीच्या दरात देण्यात यावी, अशी मागणी राज्याचे उपमुख्यमंत्री तथा बीडचे पालकमंत्री अजित पवार यांच्याकडे अन्न व नागरी पुरवठामंत्री धनंजय मुंडे यांनी केली.

बीड जिल्हा मध्यवर्ती सहकारी बँकेच्या विविध अडचणीच्या संदर्भात उपमुख्यमंत्री तथा बीड जिल्ह्याचे पालकमंत्री अजित पवार यांच्या अध्यक्षतेखाली बुधवारी (ता. २९) मुंबईत झालेल्या बैठकीस श्री. मुंडे दिल्ली येथून ते व्हीसीद्वारे सहभागी झाले.

बँकेच्या शाखांमध्ये आधुनिक भौतिक व तांत्रिक सुविधा निर्मितीसाठी १५ कोटी रुपयांची विशेष मदत शासनाने करावी आणि जिल्हा बँकेचे शासनाच्या विविध सवलत योजनेतील बाकी असलेले येणे शासनाने लवकरात लवकर अदा करावे, अशी विनंतीही श्री. मुंडे यांनी केली.

या सर्वच विषयी अर्थ व नियोजन विभाग, राज्य सहकारी बँक, नाबार्ड यांच्याशी चर्चा करून सकारात्मक निर्णय घेतला जाईल, तसेच सहकार विभागामार्फत बँकेसाठी एक तज्ज्ञ अधिकारी दिला जाईल, असे आश्‍वासन श्री. पवार यांनी दिले.

या बैठकीस सहकारमंत्री बाबासाहेब पाटील, पर्यावरण व पशुसंवर्धनमंत्री पंकजा मुंडे यांसह अर्थ व नियोजन विभाग, राज्य सहकारी बँक तसेच नाबार्डचे अधिकारी, बीडचे जिल्हाधिकारी अविनाश पाठक तसेच जिल्हा बँकेचे प्रशासकीय मंडळ आदी उपस्थित होते. बीड जिल्हा मध्यवर्ती बँकेच्या माध्यमातून शेतकरी वर्गाला दिलासा देण्यासाठी सकारात्मक प्रतिसाद दिल्याबद्दल मुंडे यांनी उपमुख्यमंत्री अजित पवार यांचे आभार मानले.