Solapur News : करमाळा तालुक्यातील उजनी लाभक्षेत्रासह माढा, माळशिरस, पंढरपूर, इंदापूर येथे निर्यातक्षम केळीचे उत्पादन मोठ्या प्रमाणात घेतले जात आहे. परंतु मागील दोन वर्षांपासून नामांकित कंपन्यांच्या रोपांमध्ये जाणीवपूर्वक ‘कृत्रिम’ तुटवडा निर्माण केला जात आहे. तसेच प्रतिरोप १० ते १५ रुपयांने चढ्या दराने रोपांची खरेदी करावी लागत आहे.

काही विक्रेत्यांकडून नामांकित रोपवाटिकेतील रोपांच्या नावाखाली इतर स्थानिक रोपवाटिकेतील रोपांची विक्री सुरू आहे. अशा स्थानिक रोपवाटिकेतील रोपांची निर्मिती करताना विशेष काळजी न घेतल्याने केळी बागा लवकर रोगास बळी पडतात.

परिणामी, मालाचा दर्जा ही राखला जात नाही. एका बाजूला केळीला उच्चांकी दर मिळत असताना, रोप विक्रेत्या कंपन्यांच्या उदासीनतेमुळे व अधिकृत डीलर यांच्याकडून होत असलेल्या पिळवणुकीमुळे शेतकऱ्यांना वेळेवर लागवड करता येत नाही. तसेच मोठ्या प्रमाणावर आर्थिक लूट होत आहे. त्यामुळे गैरप्रकारांना आळा घालण्याची मागणी शेतकऱ्यांमधून होत आहे.

ठिबकसह अन्य साहित्याची सक्ती

रोपांच्या खरेदीसाठी विक्रेत्यांकडे गेल्यावर आमचे ठिबक घ्या, खते घ्या. निश्चित किंमतीत रोपे दिली जातील, अशी अट घातली जात आहे. त्यामुळे अशा वेगवेगळ्या प्रकारच्या युक्त्या लढवून शेतकऱ्यांना कोंडीत पकडले जात आहे. इच्छा नसतानाही ठिबक संच किंवा निर्धारित किमतीपेक्षा जास्त पैसे केळी रोपांसाठी मोजावे लागत आहेत.