Kolhapur News : शाहूवाडी, पन्हाळा तालुक्यामध्ये बांबू लागवड आणि लघू उद्योगाला चालना देण्यासाठी शासनाला ‘बांबू क्लस्टर’चा प्रस्ताव सादर केला आहे. यामध्ये ग्रामपंचायत, वन विभाग आणि बांबू विषयात काम करणाऱ्या संस्थांच्या सहयोगाने नियोजन केले आहे. बाजारपेठेची मागणी लक्षात घेऊन शेतकऱ्यांनी गट शेतीच्या माध्यमातून बांबू लागवडीस प्राधान्य द्यावे, असे प्रतिपादन आमदार डॉ. विनय कोरे यांनी केले.

कृषी विभाग आणि कल्याणकर बांबू फार्म यांच्या संयुक्त विद्यमाने रविवारी (ता.२७) हुंबवली येथे बांबू लागवड मार्गदर्शन कार्यशाळा आयोजित करण्यात आली होती. यावेळी प्रमुख पाहूणे म्हणून डॉ. विनय कोरे यांनी मार्गदर्शन केले. कार्यशाळेला गोकूळचे संचालक कर्णसिंह गायकवाड, सर्जेराव पाटील, सुभाष इनामदार, बाळासाहेब गद्रे,अमरसिंह खोत, तालुका कृषी अधिकारी एस. ए. चाकणे, माजी कृषी सहसंचालक उमेश पाटील, कृषी पर्यवेक्षक शिवाजी काशिद आदी मान्यवर उपस्थित होते.

या वेळी मार्गदर्शन करताना डॉ. विनय कोरे म्हणाले, की जल, मृदा संधारण, खाद्य प्रक्रिया आणि लघूउद्योगाच्यादृष्टीने बांबू हे महत्वाचे पीक आहे. पारंपरिक उत्पादनांच्या बरोबरीने शोभेच्या वस्तू, बांधकाम साहित्य, फर्निचर, रोपवाटिका, उदबत्ती निर्मिती आदी उद्योगांतून रोजगार निर्मिती होणार आहे. बांबू कोंबाच्या खाद्य पदार्थांना देश परदेशात चांगली मागणी आहे. बांबू लागवडीमुळे शेतकऱ्यांच्या डोंगरी जमिनी तसेच वन विभागाच्या प्रक्षेत्रावर जल,मृदा संधारणास चालना मिळेल, दरडी कोसळण्यावर नियंत्रण येईल. हवामान बदलाच्या काळात शाश्वत ऊर्जा निर्मिती, कार्बन क्रेडीटच्यादृष्टीने बांबू पीक महत्त्वाचे आहे.

दापोली येथील वनशास्त्र महाविद्यालयाचे सहयोगी अधिष्ठाता डॉ.अजय राणे म्हणाले की, आम्ही माणगा रोप निर्मितीचे तंत्र विकसित केले आहे. माणगा बांबूला बाजारपेठेत चांगली मागणी आहे. आपल्या परिसरातील बाजारपेठेची मागणी लक्षात घेऊनच बांबू जातींची निवड करावी.

बांबू अभ्यासक विनय कोलते म्हणाले की, शेतकरी गट, शेतकरी उत्पादक कंपन्यांच्या माध्यमातून बांबू लागवड आणि विक्रीचे नियोजन करावे. विक्रीसोबत प्रक्रिया उद्योग आणि पर्यटनाच्यादृष्टीनेही बांबूला चांगली मागणी आहे.

कार्यशाळेमध्ये बांबू बोर्डाचे समन्वयक अजित भोसले, प्रयोगशील शेतकरी अरविंद कल्याणकर, अमित पाटील यांनी बांबू लागवड तसेच उत्पादनाबाबत अनुभव मांडले. कार्यशाळेचे प्रास्ताविक तालुका कृषी अधिकारी एस.ए.चाकणे आणि स्वागत अरविंद कल्याणकर यांनी केले. सूत्रसंचालन राजेंद्र लाड यांनी केले. कार्यशाळेमध्ये कृषी विभागातील अधिकारी, शेतकरी तसेच महिला बचत गटातील सदस्यांची उपस्थिती होती.