Pune News : शोभिवंत फुलांच्या आणि रोपांच्या मागणीत दिवसेंदिवस वाढ होत आहे. रोपवाटिका उद्योग विस्तारत असताना, या उद्योगासाठी लागणाऱ्या निविष्ठा आणि कीटकनाशकांचा संतुलित आणि सुरक्षित वापर होणे गरजेचे आहे.

यासाठी रोपवाटिकाचालक शेतकरी आणि कामगारांना शास्त्रोक्त पद्धतीने कीटकनाशके वापरातून कुशल करणे गरजेचे आहे, असे प्रतिपादन पुष्पसंशोधन संचालनालयाचे संचालक डॉ. के. व्ही. प्रसाद यांनी केले.

‘स्वच्छता ही सेवा अभियान २०२४’ याअंतर्गत पुष्पसंशोधन संचालनालयाच्या वतीने सहकारी शेतकरी फूल नर्सरी गट आणि चिंतामणी मित्र मंडळाच्या वतीने ‘शोभेच्या रोपवाटिका कामगारांसाठी शेत सुरक्षा हाताळणी प्रशिक्षण’ शिबिराचे नुकतेच आयोजित करण्यात आले होते.

या कार्यक्रमाला पुष्पसंशोधन संचालनालयाचे संचालक डॉ. के. व्ही. प्रसाद, राष्ट्रीय कांदा लसूण संशोधन संचालनालयाचे डॉ. कौशिक बॅनर्जी, द्राक्ष संशोधन केंद्राचे डॉ. विजय महाजन, मराठा चेंबर ऑफ कॉमर्स, इंडस्ट्रीज आणि अॅग्रिकल्चरच्या कृषी विभागाचे प्रमुख शंतनू जगताप उपस्थित होते.

या वेळी पुष्पसंशोधन संचालनालयाचे वरिष्ठ संशोधक डॉ. गणेश कदम, डॉ. नरेंद्र गजभिये यांनी नर्सरी उद्योगातील समस्या आणि निराकरण या विषयावर मार्गदर्शन केले. या वेळी शेतकऱ्यांना वनस्पती संरक्षणासाठी सुरक्षा किट दिली गेली, तसेच त्यांना सुरक्षितता उपायांबाबत मार्गदर्शन करण्यात आले.