Farmers Protest Against Government : राज्यभर होळीचा सण मोठ्या उत्साहात साजरा केला जात आहे. दरम्यान, माजी राज्यमंत्री बच्चू कडू यांनी वेगळ्या पद्धतीने धुलीवंदन साजरे केले आहे. अमरावती जिल्ह्यातील कुरळपूर्णा येथे बच्चू कडूंनी तब्बल ५ किमी रस्ते रंगवत शेतकऱ्यांच्या अनेक मागण्या करण्याचे आवाहन सरकारला केले आहे. याचबरोबर कडू यांनी सरकारवर जोरदार टीकाही केली.

सरकार शेतकऱ्यांच्या मागण्या मान्य करत नसल्याची नाराजी व्यक्त करत बच्चू कडू म्हणाले की, ''रंगपंचमी हा उत्सव आहे. पण यातून आम्ही सरकारकडे विविध मागण्याचे आवाहन केले आहे. सरकारने रंगाचं राजकारण करून शेतकऱ्यांना मूर्ख बनवण्याचं काम केलं आहे. या सरकारनं कर्जमाफीचं आश्वासन दिलं होतं. मात्र, कर्जमाफी दिलेली नाही. दुसरीकडे शेतमालाला भावही मिळत नसल्याची स्थिती आहे. अशाप्रकारे शेतकऱ्यांवर दुहेरी अन्याय करण्याचं काम सरकारनं केलं आहे.'' असे बच्चू कडू म्हणाले.

''बटेंगे तो कटेंगेच्या घोषणेत शेतकरी पूर्णपणे दुर्लक्षित झाला आहे. आज शेतकऱ्यांच्या सोयाबीन आणि तुरीला भाव नाही. सरकारने कर्जमाफीची घोषणा केली. पण या अर्थसंकल्पात त्याचा साधा उल्लेखही केलेला नाही. दिव्यांगांचे चार महिन्यापासून पैसे अद्यापही मिळालेले नाही, खरं तर सरकार या सगळ्यांकडे जाणीवपूर्वक दुर्लक्ष करते आहे'', असा आरोपही बच्चू कडू यांनी केला.

''या मागण्या सरकारपर्यंत पोहोचवण्यासाठी यावर्षी आम्ही ५ किलोमीटर रस्ता रंगून शासनाला एक प्रकारचा इशारा दिला आहे. सरकारनं आमच्या अंगावर खुनाचा रंग चढवला आहे. लाल रंग त्यांनी आमच्या कपाळाला लावला आहे. त्यामुळे आज शेतकऱ्यांची दयनीय अवस्था बनलीय शेतकरी आणि मजुरांचा रंग फिक्का पडला आहे. त्यांच्या आयुष्यातला रंग उडाला आहे'', अशी जोरदार टीका बच्चू कडू यांनी केली.

बच्चू कडू यांची काँग्रेसवर टीका

माजी राज्यमंत्री बच्चू कडू यांनी काँग्रेस नेते नाना पटोले यांच्या वक्तव्यावर टीका केली. "नानाभाऊंची ही ऑफरच मोठी हास्यास्पद आहे. काँग्रेसचं सध्या स्थिर आहे की नाही हे समजत नाही. काँग्रेसचे २० आमदार आहेत, तर १ तर आताच शिंदे गटात गेले आहेत. नाना पटोले यांची ऑफर चांगली आहे. पण त्यांनी काँग्रेस कुठंय ते शोधलं पाहिजे". अशी खरमरीत टीका नाना पटोलेंनी केली.