Chakan News: मुंबईतील दादर मार्केटमध्ये खेड तालुक्यातून एकावेळी पन्नास ते शंभर ट्रक ॲस्टरच्या फुलांच्या पाट्याने भरून जायच्या. गेल्या पंचवीस, तीस वर्षांपूर्वीचे हे दृश्य होते. पण आज हे दृश्य नाहीसे झाले आहे. खेड तालुक्यात ॲस्टर अखेर कोमेजले आहे. ॲस्टरच्या फुलांना मोठी मागणी असायची. पण ॲस्टरची शेती नाहीशी झाली आहे. काळुस, वाकी, भाम, भोसे या खेड तालुक्यातील अष्टरच्या नंदनवनात ॲस्टरची फुलशेती हद्दपार झाली आहे हे भयानक चित्र आहे.

खेड तालुक्यातील चाकण परिसर काळुस, वाकी, भाम, रासे, भोसे, शेलगाव, शेलपिंपळगाव, बहुळ, कोयाळी दौंडकरवाडी, वडगाव घेणंद, सोळू, धानोरे, मरकळ व इतर परिसरात गेल्या पंचवीस, तीस वर्षांपूर्वी ॲस्टर फुलांचे मोठ्या प्रमाणात उत्पादन घेतले जायचे. काळुस, वाकी, भाम चाकण येथे मुंबई दादर पुणे येथे फुलांच्या पाट्या (डाग) पाठवणारे अनेक हुंडेकरी असायचे.

हुंडेकरी ॲस्टरच्या फुलांच्या पाट्या (डाग) याचे संकलन करायचे. रात्री आठ ते दहा, अकरा च्या सुमारास या गाड्या मुंबई दादर येथे निघायच्या. सुमारे पन्नास ते शंभर ट्रक चाकण परिसरातून ॲस्टरच्या फुलांच्या जायच्या. पहाटे किंवा सकाळी त्या मुंबईत पोहोचायच्या आणि त्यानंतर मुंबई, दादर मार्केटमध्ये ॲस्टरच्या फुलांची विक्री व्हायची. काही शेतकरी अगदी पाच, दहा ते वीस एकरांपर्यंत ॲस्टरच्या फुलांची शेती करायचे.

शेकडा जुड्यांना त्यावेळेस अगदी दहा, पन्नास रुपयांपासून शंभर, सव्वाशे, दीडशे रुपयांपर्यंत भाव मिळायचा. अधिक भाव मिळाला की काही शेतकरी अगदी लखपती ही व्हायचे. कमी भाव मिळाला की शेतकऱ्यांचे आर्थिक नुकसान व्हायचे. रस्त्यावर फुले टाकून द्यायची शेतात फुले टाकून द्यायची. फुलशेती सोडून द्यायची असे भयानकही चित्र असायचे.

शंभर जुड्यांना दीडशे ते दोनशे रुपये भाव

गणेशोत्सव, दसरा, दिवाळी, लग्न हंगाम या दिवसात ॲस्टरच्या फुलांना मोठी मागणी असायची. त्यावेळेस अगदी शंभर जुड्यांना शंभर, सव्वाशे, दिडशे रुपये भाव मिळाला तरी शेतकरी खूश व्हायचे. सध्या शंभर जुड्यांना दीडशे ते दोनशे रुपये भाव आहे. परंतु हा भाव कमी आहे. मजुरीच्या व इतर खर्चाच्या दृष्टीने शेतकऱ्यांना हा भाव परवडत नाही, असे शेतकरी संपत पवळे, रामदास पवळे यांनी सांगितले.