Akola News : रब्बी हंगामात शेतकरी गहू, हरभरा या दोन पारंपरिक पिकांना पर्याय म्हणून इतर पिकांकडे वळत आहेत. यंदा जिल्ह्यात काळे जिरे, सोप, ओवा तसेच चिया सीडची लागवड विस्तारत आहे. जिल्ह्यात प्रथमच चिया सीड २०० एकरांपर्यंत लागवड क्षेत्र पोहोचण्याची शक्यता आहे. पहिल्यांदाच चिया सीडचे एवढ्या क्षेत्रावर जिल्ह्यात लागवड होत आहे.

अकोला जिल्ह्यात मागील अनेक वर्षांपासून खारपाण पट्ट्यात ओव्याची रब्बीत लागवड केली जाते. कमी पाण्यात येणारे हे पीक उत्पादनात बऱ्याच शेतकऱ्यांचा हातखंडा निर्माण झालेला आहे. या पिकाच्या जोडीला आता काळे जिरे, सोप, चिया सीडची लागवड सुद्धा होऊ लागली आहे.

चिया सीडला बाजारात चांगली मागणी असून दरही मिळतो आहे. काही कंपन्या चिया सीड उत्पादन वाढीसाठी प्रयत्नशील झालेल्या असून करार पद्धतीने शेतकऱ्यांसोबत काम सुरू केले आहे. यंदाच्या रब्बी हंगामात सिंचनासाठी पाण्याची उपलब्धता कमी असल्याने गव्हासारखे जास्त पाण्याचे पीक कमी लागवड होत आहे. तर हरभऱ्यालाही गेल्या काही हंगामात मर रोगाचा प्रादुर्भाव अधिक होत असल्याने आणि कमी दरांमुळे शेतकरी पर्यायी पिकांच्या लागवडीला प्राधान्य देत आहेत. यामुळेच यंदा चिया सीडची लागवड वाढत आहे.

चिया सीडच्या लागवडीबाबत कृषी विभाग व आत्मा यंत्रणेमार्फत मार्गदर्शन केले जात आहे. चिया सीडचे व्यवस्थापन कसे करावे, पीक उत्पादनासाठी आवश्‍यक असलेले बारकावे समजून सांगण्यात येत आहेत.