Parbhani News : कृषी पदवी अभ्यासक्रमात पशुसंवर्धन व दुग्धशास्त्र विषय पूर्वीप्रमाणे कायम ठेवण्याचे आश्‍वासन दिल्यामुळे चारही कृषी विद्यापीठांतील या विषयाच्या विद्यार्थ्यांचे राहुरी येथील प्रस्तावित आंदोलन तूर्त स्थगित करण्यात आले आहे, अशी माहिती डॉ. श्रीकांत शिंदे यांनी दिली.

सहाव्या अधिष्ठाता समितीच्या अहवालानुसार, कृषी पदवी अभ्यासक्रमात पशुसंवर्धन व दुग्धशास्त्र विषयांना कात्री लावण्यात आलेली आहे. त्याबद्दल या विषयाच्या विद्यार्थ्यांनी नाराजी व्यक्त करत आंदोलनाची तयारी केली होती.

त्या अनुषंगाने राहुरी येथे चारही कृषी विद्यापीठातील डॉ. श्रीकांत शिंदे, डॉ. प्रवीण झिने, डॉ. भाऊसाहेब गायकवाड, डॉ. निकिता अनारथे, डॉ. फाल्गुनी खडसे आदींनी महात्मा फुले कृषी विद्यापीठाचे कुलगुरू डॉ. प्रशांतकुमार पाटील यांना,

तर पुणे येथे डॉ. सुजित भालेराव, सलोनी चव्हाण, ऋतुजा टेले, हर्षवर्धन पाटील आदींनी महाराष्ट्र कृषी शिक्षण व संशोधन परिषदेचे उपाध्यक्ष तुषार पवार यांना निवेदन दिले. डॉ. पाटील यांनी आपण पशुसंवर्धन आणि दुग्धशास्त्र विभागाचे विषय कृषी अभ्यासक्रमात पूर्वीप्रमाणे कायम ठेवण्यासाठी अनुकूल असल्याचे सांगितले.

त्यासाठीच्या सूचना अधिष्ठाता समितीचे प्रमुख आणि सदस्यांना केल्या आहेत. त्यासंदर्भात येत्या दोन दिवसांत बैठक घेऊन हा विषय मार्गी लावू, असे आश्‍वासन दिले आहे.