Pune News : आळेफाटा परिसरातील शेतकऱ्यांचा कांदा बियाणे बनवण्याकडे कल वाढलेला दिसून येत आहे. ठिकठिकाणी शेतकऱ्यांनी कांद्याचे बियाणे टाकलेले असून ते आता बीजोत्पादनासाठी लावलेले कांदे बी भरण्याच्या अवस्थेत असून हे शेत अतिशय मनमोहक दिसत आहे.

गतवर्षी कांदा बियाण्यांचा मोठ्या प्रमाणात तुटवडा होता, त्यातच अवकाळी व अति पर्जन्यामुळे मोठ्या प्रमाणात कांदा रोपांचे नुकसानन झाले होते. त्यामुळे कांदा बियाण्यांना सोन्याचा बाजार भाव प्राप्त झाला होता.

एक हजार रुपयांना मिळणारे कांदा बी तीन ते चार हजार रुपयांपर्यंत बाजारभावाने शेतकऱ्यांनी खरेदी केले होते. त्यातच कंपन्यांकडून आलेल्या बोगस बियाण्यांमुळे मोठ्या प्रमाणात तोटा सहन करावा लागला होता. या भेसळयुक्त बियाण्यांमुळे ४० टक्के क्षेत्रावर डेंगळे आल्याचे पाहवयास मिळत आहे.

त्यातच सध्या कांद्याला बाजारभाव अतिशय कमी असल्याने शेतकऱ्यांना मोठा आर्थिक भुर्दंड बसला आहे. यामुळे या वर्षी कांदा बियाणे बऱ्याच शेतकऱ्यांनी स्वतःच्या शेतात तयार केलेले दिसून येत आहे.