Pune News : येथे दूध दरासाठी आमरण उपोषण सुरू असताना गुरुवारी (ता. ७) सायंकाळी आणि रात्री सोनाई दूध संघाचे दुधाने भरलेले टँकर अडवून त्यांच्यावर दगडफेक केली. तसेच चालकाला दमदाटी व मारहाण करून चावी काढून घेत सीलबंद असलेले दूध रस्त्यावर सोडून देण्यात आल्याची घटना घडली आहे. याप्रकरणी इंदापूर पोलिस ठाण्यात अज्ञात १२ व्यक्तींवर गुन्हा दाखल करण्यात आला आहे.

या बाबत किरण सुखदेव मोरे (रा. बावडा, ता. इंदापूर) यांनी दिलेल्या फिर्यादीनुसार, इंदापूर शहराच्या हद्दीतील पुणे- सोलापूर मार्गावरील अकलूज पुलाजवळील सेवा रस्त्यावर दुधाने भरलेला सोनाई डेअरीचा टँकर (क्र.एमएच ४२ टी ४१००) हा दूध घेऊन जात असताना अचानक २२ ते २४ वयोगटातील सहा ते सात युवकांनी तोंडाला रुमाल बांधून टॅंकरच्या केबिनमध्ये घुसून बळजबरीने चावी काढून हाताने मारहाण करून फिर्यादीच्या पॅन्टच्या खिशातील पाचशे रुपयेही काढून घेतले.

तसेच टँकरच्या पाठीमागे जात टॅंकरचे सील तोडून त्यातील पाच ते सहा हजार लिटर दूध खाली सोडून दिले. यात डेअरीचे दीड लाख रुपयांचे नुकसान झाले आहे.

तर चालक शरद बबन घाडगे (रा. चांडगाव, ता. इंदापूर) हे घेऊन चाललेल्या टँकर हा देखील भाटनिमगाव ते काळेवाडी नंबर एक येथील दूध भरून घेऊन चाललेल्या टँकरला पुणे-सोलापूर महामार्गावरती राजवडी पुलचढत असताना मोटर सायकल आडव्या मारुन दुधाचे सीलबंद वाल तोडून सात हजार लिटर दूध रस्त्यावर सोडून दिले.

यामध्ये १ लाख ७५ हजार रुपयांचे नुकसान झाले असल्याचे नमूद केले आहे. या बाबत बोलताना पोलिस निरीक्षक दिलीप पवार यांनी आरोपींचा शोध सुरू असल्याचे सांगितले.