Sangli News : जिल्ह्यातील मिरज तालुक्याचा पूर्व भाग, कवठेमहांकाळ तालुक्यातील काही भागात द्राक्षाची आगाप फळ छाटणी ऑगस्टच्या मध्यापासून सुरु होते. फळ छाटणीसाठी राज्यासह परराज्यातून मजूरही दाखल झाले आहेत. मात्र, यंदा जून आणि जुलै महिन्यात मुसळधार पाऊस आहे. या पावसामुळे द्राक्षाची आगाप फळ छाटणी लांबणीवर पडली आहे.

जिल्ह्यात द्राक्षाचे सरासरी १ लाख ५० हजार एकरांवर क्षेत्र आहे. मिरज तालुक्याचा पूर्व भाग, कवठेमहांकाळ तालुक्यातील काही गावात ऑगस्ट महिन्याच्या मध्यापासून शेतकरी फळ छाटणी घेतात. दरवर्षी ऑगस्ट महिन्याच्या दुसऱ्या आठवड्यापासून काही प्रमाणात फळ छाटणीस प्रारंभ होतो.

त्यानंतर सप्टेंबर, ऑक्टोंबर या दोन महिन्यांत जिल्ह्यातील द्राक्षाची फळ छाटणी पूर्ण होते. या दरम्यान, फळ छाटणी घेतलेली द्राक्ष डिसेंबर मध्ये विक्रीला येतात. यावेळी द्राक्षाला अपेक्षित दर मिळतो. त्यामुळे शेतकरी जूलै महिन्यापासून आगाप फळ छाटणीचे नियोजन करतात. मात्र, गतवर्षी पावसाने मारल्याने आगाप फळ छाटणी उशिरा सुरु झाली होती. त्यानंतर फुलोरावस्थेत असताना पावसाने हजेरी लावली. यामुळे द्राक्षाचे नुकसान झाले होते.

यंदा जून महिन्यापासून पावसाचा सुरवात झाली. जून महिन्यात मुसळधार पाऊस पडला. त्यानंतर जुलैच्या मध्यापर्यंत पावसाने विश्रांती घेतली. त्यामुळे शेतकऱ्यांनी फळ छाटणीचे नियोजन सुरु केले. जिल्ह्यात परराज्यातून द्राक्ष बागेत काम करण्यासाठी मजूरही दाखल होतात. मात्र, जुलैच्या मध्यापासून पुन्हा जोरदार पावसाला सुरवात झाली.

त्यामुळे मजूर दाखल झाले नाहीत. ऑगस्ट महिन्यातील पहिल्या पंधरा दिवसात पुन्हा पावसाने विश्रांती घेतली. ऑगस्टच्या मध्यापासून आगाप फळ छाटणीस सुरवात होते, त्यामुळे परराज्यातील मजूर जिल्ह्यात दाखल झाले. शेतकऱ्यांनी पुन्हा द्राक्षाची आगाप फळ छाटणीचे नियोजन केले.

मात्र, विश्रांतीनंतर पुन्हा पावसाचा जोर वाढला. जिल्ह्यात सर्व दूर सलग पाऊस सुरु होता. त्यामुळे शेतकरी हवालदिल झाला. अति पावसामुळे ओलांडल्यावर मुळ्या फुटल्या आहेत. बागांत पाणी साचले आहे. त्यामुळे फळ छाटणी अडथळे निर्माण झाले आहेत. परिणामी द्राक्षाची आगाप फळ छाटणी लांबणीवर पडली आहे. त्यामुळे सप्टेंबर महिन्याच्या दुसऱ्या आठवड्यापासून एकाच वेळी फळ छाटणी सुरु होण्याची शक्यता आहे.