Monsoon Rain : बोर्डी : तलासरी तालुक्यातील झाई-बोरीगाव ग्रामपंचायत क्षेत्रातील पश्चिम रेल्वेवरील बोर्डी रोड रेल्वे स्थानकापासून झाई पोलिस चौकीपर्यंतच्या रस्त्याची दुरवस्था झाली आहे. चालकांसह वाटसरूंना तारेवरची कसरत करून या रस्त्यावरून मार्गक्रमण करावे लागत आहे.

मागील चार वर्षांपासून बोर्डी रेल्वे स्थानकादरम्यान रेल्वे फ्रेट कॉरिडॉरच्या उड्डाणपुलाचे काम चालू आहे. याकरिता बांधकाम साहित्य पुरवणाऱ्या अवजड वाहनांमुळे या रस्त्याची दुरवस्था झाली आहे.

मात्र सार्वजनिक बांधकाम खाते, याकडे डोळेझाक करत असल्यामुळे नागरिकांमध्ये असंतोष आहे. २०२२ च्या पावसाळ्यात स्थानिकांनी आंदोलनाचा इशारा दिल्यानंतर थातूरमातूर दुरुस्ती करण्यात आली.

तसेच मे २०२३ पर्यंत या कामाची पूर्णतः करण्यात येईल, असे आश्वासन दिले होते, मात्र त्यानंतर वर्षभर सार्वजनिक बांधकाम खात्याने कोणतीही पावले उचलली नाहीत. त्यामुळे पावसाळ्यात नागरिकांचे प्रचंड हाल होणार आहेत.

झाई येथून पश्चिम रेल्वेच्या पूर्वेकडे तलासरी तालुक्याचे ठिकाण आहे. तसेच मुंबई-अहमदाबाद महामार्गाला जोडणारा हा सीमेवरील मुख्य रस्ता आहे. त्यामुळे वाहनांची वर्दळ असते; परंतु रस्त्याची दुरवस्था झाल्यामुळे वाहतुकीमध्ये अडथळे आहेत.