Baramati News : आगामी लोकसभा निवडणुकीसाठी प्रशासनाकडूनही तयारी सुरू झाली असून, मतदार याद्या अद्ययावत करण्याचे काम सुरू आहे. उपलब्ध आकडेवारीनुसार यंदाच्या लोकसभा निवडणूकीसाठी ९ फेब्रुवारीअखेरपर्यंत ३ लाख ६४ हजार ४० मतदारांची नोंदणी झाल्याची माहिती तहसीलदार गणेश शिंदे यांनी दिली.

लोकसभा निवडणुकीच्या पार्श्‍वभूमीवर महसूल प्रशासनाने निवडणुकीच्या दृष्टीने गेल्या काही महिन्यांपासूनच तयारी सुरू केली होती. सध्या तयारी अंतिम टप्प्यात असून, निवडणूक आयोगाच्या मार्गदर्शक तत्त्वानुसार कार्यवाही केली जात असल्याचे तहसीलदारांनी नमूद केले.

दरम्यान, बारामती तालुक्यात ९ फेब्रुवारी अखेरपर्यंत १ लाख ८५ हजार ९२६ पुरुष, तर १ लाख ७८ हजार ०९३ महिला व २१ तृतीयपंथी असे एकूण ३ लाख ६४ हजार ०४० मतदारांची नोंद आहे. उपलब्ध आकडेवारीनुसार बारामती विधानसभा मतदार संघात प्रशासनाकडून ७ हजार ३६२ मतदारांची नावे नव्याने समाविष्ट करण्यात आली आहेत. दुसरीकडे ५ हजार ९१३ मतदारांची नावे मृत्यू व इतर कारणांनी कमी केली आहेत. त्याच वेळेस १ हजार ४ नावांमध्ये दुरुस्ती करण्यात आली आहे.

दरम्यान, उमेदवारी अर्ज दाखल करण्याच्या शेवटच्या तारखेपर्यंत मतदार यादीमध्ये नवीन मतदारांचे नाव समाविष्ट केले जाणार आहे. पात्र मतदार मतदानापासून वंचित राहू नये, या उद्देशाने निवडणूक आयोगाने सूचना जारी केलेल्या आहेत. दररोज रात्री बारा वाजता मतदार यादी अपडेट केली जात आहे.

बारामतीत ३७६ मतदान केंद्रे ः

उपलब्ध आकडेवारीनुसार बारामती विधानसभा मतदार संघाच्या कार्यक्षेत्रात ३७६ मतदान केंद्रे असतील. यात १५०० हून अधिक मतदार संख्या असलेली तीन, १२०० ते १५०० संख्या असलेली ८० मतदान केंद्रे आहेत. ज्या मतदान केंद्रावर १५०० पेक्षा जास्त मतदार संख्या आहे, अशा तीन ठिकाणी सहायकारी मतदान केंद्रे करण्यात येणार आहेत.