Baramati News : माळेगाव, ता. बारामती येथे सुरू असलेल्या कृषिक प्रदर्शनात ११ कोटी रुपये किमतीचा मारवाडी जातीचा घोडा सर्वांचे लक्ष वेधून घेत आहे.

याशिवाय १५०० किलो वजनाचा १ कोटी रुपये किमतीचा कमांडो नावाचा रेडा आणि सोन्या-मोन्या ही बैल जोडीही या प्रदर्शनात गाजतायेत. ‘ग्लोबल ते लोकल’ कृषी तंत्रज्ञान घेऊन आलेल्या या प्रदर्शनात यंदा नव संशोधकांचे शेती व शेतीपूरक प्रकल्प वैशिष्ट्यपूर्ण ठरत आहेत.

शारदानगर येथे भरविलेल्या कृषिक प्रदर्शनाचा तिसरा दिवसही ‘हाऊस फूल’ होता. अश्व आणि पशूपक्षी प्रदर्शनामध्ये मारवाडी आणि भीमथडी उत्तम प्रतीचे अश्व येथे उपलब्ध आहेत. देखणे, दिमाखदार अश्व, खिल्लार कालवडी, विविध प्रकारचे पक्षी सर्वांच्या आकर्षणाचे केंद्र ठरत आहेत.

विशेषतः हैदराबादचे नवाब हसन बिनत्रिफ यांचा ११ कोटी रुपये किमतीचा मारवाडी जातीचा घोडा सर्वांचे लक्ष वेधून घेत आहे. हिंद केसरीचा किताब पटकाविलेल्या संतोष कोकणे यांच्या ‘सोन्या-मोन्या’ या खिलार बैलांच्या जोडीचे नवलही वेगळे आहे.

‘सोन्या-मोन्या मुका घे म्हटले की ते मुका घेतात, पाय जुळवून घे म्हणले की ते घेतात,’ असे श्री. कोकणे म्हणाले. लोहा (जि. नांदेड) तालुक्यातील विश्वनाथ जाधव यांच्या राम व रावण या लालकंधारी जातीची बैलांची जोडीलाही पाहण्यासाठी मोठी गर्दी होत आहे.