Chh. Sambhajinagar News : मराठवाड्यातील आठही जिल्ह्यांतील ८७९ लघु, मध्यम, मोठ्या प्रकल्पांसह विविध नद्यांवरील बंधाऱ्यांमध्ये असलेला उपयुक्त पाणीसाठा आता ७२.७५ टक्क्यांवर आला आहे.

आताच्या घडीला उपलब्ध असलेल्या उपयुक्त पाणीसाठ्यात ११ मोठ्या प्रकल्पातील ८३.२० टक्के, मध्यम ७५ प्रकल्पात ६९.१३ टक्के, ७५१ लघु प्रकल्पात ५०.९३ टक्के, गोदावरी नदीवरील १५ बंधाऱ्या २६.२७ टक्के, तेरणा, मांजरा, रेणा नदीवरील २७ बंधाऱ्यात असलेल्या ८९.४९ टक्के पाणी साठ्याचा समावेश आहे.

एकूण ७५ मध्यम प्रकल्पांपैकी तीन प्रकल्पात २५ टक्क्यांपेक्षा कमी, ७ प्रकल्पात २५ ते ५० टक्के, २४ प्रकल्पात ५० ते ७५ टक्के तर ३९ प्रकल्पांत ७५ टक्के जास्त पाणीसाठा शिल्लक आहे. एकूण ७५१ पैकी ८१ प्रकल्पात २५ टक्क्यांपेक्षा कमी, १४३ प्रकल्पात २५ ते ५० टक्के दरम्यान, २१९ प्रकल्पात ५० ते ७५ टक्के तर २२८ लघु प्रकल्प ७५ टक्के पेक्षा जास्त पाणीसाठा शिल्लक असल्याचे जलसंपदा विभागाने कळविले आहे.

२१ प्रकल्पातील पाणीसाठा जोत्याखाली

मराठवाड्यातील १९ लघु व २ मध्यम मिळून २१ प्रकल्पातील पाणीसाठा जोत्याखाली गेला आहे. पाणीसाठा जोत्याखाली गेलेल्या दोन मध्यम प्रकल्पात जालना जिल्हा व धाराशिव मधील प्रत्येकी एका प्रकल्पाचा समावेश आहे.

दुसरीकडे पाणीसाठा जोत्याखाली गेलेल्या १९ लघु प्रकल्पात जालना जिल्ह्यातील १०, धाराशिव जिल्ह्यातील ७ तर नांदेड जिल्ह्यातील व लातूर जिल्ह्यातील प्रत्येकी एका लघु प्रकल्पाचा समावेश आहे. बीड जिल्ह्यातील एक लघू प्रकल्प कोरडा पडला असल्याचे जलसंपदा विभागाकडून कळविण्यात आले आहे.

सिद्धेश्वरमध्ये २४ टक्केच उपयुक्त पाणी

मराठवाड्यातील ११ मोठ्या प्रकल्पांपैकी सर्वात मोठ्या जायकवाडीत ८५ टक्के उपयुक्त पाणीसाठा शिल्लक आहे. येलदरीत ९३ टक्के,माजलगावात ६८ टक्के, मांजरात ८७ टक्के, उर्ध्व पेनगंगा ८५ टक्के, निम्नतेरणामध्ये ९१ टक्के, निम्न मनारमध्ये ७४ टक्के, विष्णुपुरीत ८७ टक्के, निम्न दुधनांमध्ये ६१ टक्के, सीना कोळेगावमध्ये ८४ टक्के, तर सिद्धेश्वरमध्ये सर्वात केवळ २४ टक्के उपयुक्त पाणीसाठा शिल्लक असल्याची जलसंपदा विभागाने कळविले आहे.