Nanded News : धर्माबाद कृषी उत्पन्न बाजार समितीअंतर्गत मोंढा बाजारात सध्या गावरान लाल मिरचीची आवक सुरू झाली आहे. बुधवारी (ता. १४) बाजारात लाल मिरचीची ५५० पोते आवक झाली. या मिरचीला प्रतिक्विंटल किमान ८१०० ते कमाल २०,००० रुपये दर मिळाल्याची माहिती बाजार समितीचे सचिव चंद्रकांत पाटील यांनी दिली.

तेलंगण राज्याच्या सीमेजवळ येणाऱ्या नांदेड जिल्ह्यातील धर्माबाद, बिलोली, देगलूर या तालुक्यांतील शेतकरी गावरान मिरचीची लागवड करतात. लाल भडक रंग तसेच चवीला प्रसिद्ध असलेल्या या मिरचीला महाराष्ट्रासह इतर राज्यातून मोठी मागणी असते.

या मिरचीचा वापर मोठ्या प्रमाणात होत असल्याने बाजारात चांगली मागणी असते. सध्या या भागातील लाल मिरचीची तोडणी सुरू आहे. या मिरचीचे मार्केट धर्माबाद कृषी उत्पन्न बाजार समिती असल्याने या ठिकाणी आवक सुरू झाली आहे.

बुधवारी (ता. १४) बाजारात ५५० पोते लाल मिरचीची आवक झाली. यास किमान आठ हजार शंभर, कमाल वीस हजार रुपये, तर सरासरी १५ हजार रुपये दर मिळाल्याची माहिती बाजार समितीचे सचिव चंद्रकांत पाटील यांनी दिली.

बाजारात सध्या हरभऱ्या‍लाही चांगला भाव मिळत आहे. बुधवारी १४२० क्विंटल हरभऱ्याची आवक झाली. यास कमाल ६२३५, तर किमान ५८०० रुपये दर मिळाला. नवीन लाल तुरीची आवक १२० क्विंटल झाली. यास कमाल ९४९५, तर किमान ८७६० रुपये दर मिळाला. पांठरी तुरीची २५ क्विंटल आवक झाली. यास किमान ९१००, तर कमाल ९४९५ रुपये दर मिळाला.