Ranchi News : झारखंडमधील विधानसभेच्या ३८ मतदार संघांमध्ये बुधवारी (ता. २०) संध्याकाळी ५ वाजेपर्यंत सुमारे ६८ टक्के मतदान झाले, असे निवडणूक आयोगाच्या अधिकाऱ्यांनी सांगितले.

झारखंड राज्यातील १२ जिल्ह्यांतील १४,२१८ बूथवर बुधवारी मतदान झाले. जामतारा जिल्ह्यात सर्वाधिक ७६.१६ टक्के मतदान झाले, त्यानंतर पाकूरमध्ये ७५.८८ टक्के, देवघरमध्ये ७२.४६ टक्के आणि रांचीमध्ये ७२.०१ टक्के मतदान झाले.

रामगढमध्ये ७१.९८ टक्के, दुमका ७१.७४ टक्के, गोड्डा ६७.२४ टक्के, साहेबगंज ६५.६३ टक्के, गिरिडीह ६५.८९ टक्के, हजारीबाग ६४.४१ टक्के आणि धनबाद ६३.३९ टक्के मतदान झाले. सायंकाळी ५ वाजेपर्यंत बोकारो जिल्ह्यात सर्वांत कमी ६०.९७ टक्के मतदान झाले.

६०.७९ लाख महिला आणि १४७ तृतीय-लिंग मतदारांसह एकूण १.२३ कोटी मतदारांनी मतदान केले असल्याचे एका अधिकाऱ्याने सांगितले.बुधवारी झालेल्या निवडणुकीच्या दुसऱ्या टप्प्यात एकूण ५२८ उमेदवार निवडणुकीच्या रिंगणात होते. तर पहिल्या टप्प्यात ४३ विधानसभा मतदार संघातील उमेदवार रिंगणात होते.

गोड्डा, देवघर, दुमका, जामतारा, साहिबगंज आणि पाकूर या सहा जिल्ह्यांचा समावेश असलेल्या ३८ पैकी अठरा मतदार संघ संथाल परगणा प्रदेशात आहेत. उर्वरित १८ जागा उत्तर छोटानागपूर विभागात आणि दोन दक्षिण छोटानागपूर विभागात आहेत.