Nashik News : निफाड तालुक्यातील कोकणगाव, भेंडाळी, करंजगाव या ३३/११ केव्ही उपकेंद्रामध्ये अतिरिक्त पाच एमव्हीए ट्रान्स्फॉर्मर उभारण्यासाठी सुमारे पाच कोटी ४८ लाख निधीस प्रशासकीय मान्यता मिळाली आहे, अशी माहिती आमदार दिलीप बनकर यांनी दिली.

निफाड तालुक्यातील कोकणगाव, भेंडाळी, करंजगाव या ३३/११ केव्ही ठिकाणी कार्यरत ५ एमव्हीए ट्रान्सफॉर्मर अतिभारीत असल्याने वारंवार ट्रीप होणे, अनेकदा नादुरुस्त होणे या कारणांमुळे या भागातील शेतकऱ्यांना आपल्या शेतीपिकांना पाणी देणे, जनावरांना पाणी अशा अनेक अडचणींचा सामाना करावा लागत होता.

शेतकऱ्यांना येणारी अडचण लक्षात घेऊन आमदार बनकर यांनी तत्कालीन व विद्यमान ऊर्जामंत्री तथा मुख्यमंत्री देवेंद्र फडणवीस व उपमुख्यमंत्री अजित पवार यांच्याकडे पाठपुरावा केला होता. त्या पाठपुराव्यास अखेर आले यश आहे.

कोकणगाव, भेंडाळी, करंजगाव या ३३/११ के.व्ही. उपकेंद्रामध्ये वाढीव ५ एमव्हीए ट्रान्सफॉर्मर उभारण्यासाठी सुमारे पाच कोटी ४८ लाख निधीस प्रशासकीय मान्यता मिळालेली आहे.

यामध्ये कोकणगाव उपकेंद्रासाठी एक कोटी ८७ लाख, भेंडाळी उपकेंद्रासाठी एक कोटी ७० लाख तर करंजगाव उपकेंद्रासाठी एक कोटी ९० लाख याप्रमाणे निधी मंजूर झाला असून निविदा प्रक्रिया पूर्ण करून लवकरच प्रत्यक्षात कामाला सुरुवात होणार असल्याची माहिती आमदार बनकर यांनी दिली. वाढीव ट्रान्सफॉर्मरमुळे निफाडमधील शेतकरी व ग्राहकांच्या विजेच्या समस्या दूर होणार आहेत.