Krushi Mohotsav : शेतकऱ्यांना राज्य सरकारच्या विविध योजना, उपक्रम, प्रयोगशील शेतकऱ्यांचे अनुभव, उत्पादक ते ग्राहक थेट विक्री या संकल्पनेवर आधारित कृषी महोत्सवांसाठी पहिल्या तिमाहीच्या २० टक्के म्हणजे १ कोटी ३६ लाख रुपये मंजूर करण्यात आले आहेत. त्यापैकी एकट्या सिल्लोड महोत्सवाला ५४ लाख ७१ हजार २८६ रुपये, तर उर्वरित जिल्ह्यांतील कृषी महोत्सवासाठी ८१ लाख २८ हजार ७१७ रुपयांच्या निधीस मान्यता देण्यात आली आहे.

कृषी महोत्सव योजनेंतर्गत प्रत्येक जिल्ह्यातील महोत्सवासाठी २० लाखांचा निधी देण्यात येणार आहे. त्यानुसार पहिल्या टप्प्यात केवळ चारच जिल्ह्यांमध्ये कृषी प्रदर्शन भरविता येणार आहे. राज्यात २०२० पासून जिल्हा कृषी महोत्सव राबविण्यात येतो. पाच दिवस चालणाऱ्या या महोत्सवात शासनाच्या विविध योजना, उपक्रमांची माहिती, संशोधित कृषी तंत्रज्ञान, नावीन्यपूर्ण प्रयोगशील शेतकऱ्यांचे अनुभव, बाजारपेठ व्यवस्थापन, कृषिपूरक व्यवसायांचे मार्गदर्शन, कृषी प्रदर्शन, परिसंवाद, शास्त्रज्ञ, तंत्रज्ञ व विचारवंत आणि अनुभवी शेतकरी, उद्योजकांची व्याख्याने आदी उपक्रम कृषी प्रदर्शनात राबविले जातात.

पाच दिवसांच्या या प्रदर्शनासाठी जिल्हानिहाय २० लाखांचा निधी मंजूर करण्यात येतो. यंदा कृषी प्रदर्शनांच्या आयोजनासाठी निधी उपलब्ध व्हावा, यासाठी ‘आत्मा’च्या संचालकांनी ७ जुलै रोजी मागणी केली होती. यंदाच्या अर्थसंकल्पात कृषी महोत्सवासाठी ६. ८० लाख रुपयांची तरतूद करण्यात आली आहे. त्यानुसार पहिल्या तिमाहीच्या १.३६ कोटी रुपयांचा निधी देण्यात येणार आहे. या निधीतून सिल्लोड महोत्सवासाठी ५४ लाख ७१ हजार २८३ इतका निधी, तर उर्वरित ८१ लाख २८ हजार, ७१७ लाख इतका निधी इतर कृषी महोत्सवांसाठी देण्यात आला आहे.