Sindhudurg News : महात्मा ज्योतीराव फुले कर्जमुक्ती योजनेअंतर्गत (Mahatma Jyotirao Phule Debt Relief Scheme) आतापर्यंत जिल्ह्यातील १२ हजार ९८७ शेतकऱ्यांच्या खात्यात ४० कोटी २९ लाख रुपये जमा झाले आहेत. अद्याप २ हजार ७८३ शेतकरी प्रोत्साहन अनुदानाच्या प्रतीक्षेत आहेत.

कर्जमुक्ती योजनेचा लाभ न झालेल्या आणि कर्जाची नियमित परतफेड शेतकऱ्यांसाठी प्रोत्साहन अनुदान योजना शासनाने राबविली. या योजनेअंतर्गत जिल्ह्यातील २२ हजार ८०४ शेतकऱ्यांनी प्रोत्साहन अनुदानासाठी ऑनलाईन प्रस्ताव केले होते.

त्यातील १५ हजार ७६१ शेतकऱ्यांची यादी अनुदानासाठी जाहीर झाली. आधार प्रमाणीकरण आणि इतर प्रक्रिया पूर्ण झाल्यानंतर पहिल्या, दुसऱ्या आणि आता तिसऱ्या टप्प्यात असे एकूण १२ हजार ९८७ शेतकऱ्यांच्या खात्यात आतापर्यंत ४० कोटी २९ लाख रूपये जमा करण्यात आली आहे.

यादीत असलेले २ हजार ७८३ शेतकरी अनुदानाच्या प्रतीक्षेत आहेत. नियमित कर्जाची परतफेड केलेल्या शेतकऱ्यांना जास्तीत जास्त ५० हजार रुपये किवा कर्जाच्या तुलनेत अनुदान दिले जात आहे.