Nashik News : चांदवड तालुक्यातील धोडांबे, वडनेरभैरव, विजयनगर, बहादुरी, वडाळीभोई येथील १२ ते १३ द्राक्ष उत्पादक शेतकऱ्यांना परराज्यातील तीन व्यापाऱ्यांनी सुमारे ३६ लाख रुपयांना गंडा घातला. या प्रकरणी विजयनगर येथील अभिमान केदू काळे (४१) यांनी वडनेरभैरव पोलिसात फिर्याद दिल्याने तिन्ही परप्रांतीय व्यापाऱ्यांविरोधात फसवणुकीचा गुन्हा दाखल करण्यात आला आहे.

तालुक्यातील विजयनगर येथील अभिमान काळे या शेतकऱ्याचे लोकंद्र सिंह, दिवाण सिंह, सुनील सिंह (तिघे रा. फत्तेपूर सिक्री, हसनपुरा, आग्रा) यांनी ३१ किलो रुपये दराने ११६.५० क्विंटल द्राक्ष ४ लाख १६ हजार रुपयांना खरेदी केले होते.

त्यापैकी २ लाख १६ हजार रुपये काळे यांना देण्यात आले. उर्वरित २ लाख रुपये देण्यास टाळाटाळ केली. त्यामुळे आपली फसवणूक झाल्याचे काळे यांच्या लक्षात येताच त्यांनी तिन्ही परप्रांतीय व्यापाऱ्यांविरोधात वडनेरभैरव पोलिसांत फिर्याद दिली आहे.

या व्यापाऱ्यांनी धोडांबे येथील विजय रकिबे (२ लाख २० हजार), शिंदे येथील महेंद्र काळे (३ लाख), चंद्रकांत गवळी (४ लाख ५० हजार), वडाळीभोई येथील बाबाजी जाधव (६८ हजार), दीपक भास्कर जाधव (५२ हजार), वडनेरभैरव येथील जगन्नाथ कारभारी पाचोरकर (५ लाख ७८ हजार ५४४),

भीमाशंकर जंगम (३ लाख ८५ हजार), शशिकांत भालेराव(२.५ लाख), चिंधू भालेराव(२ लाख), विजय नगर येथील हरिदास काळे (४ लाख ६० हजार), किरण काळे (१२ लाख पाच हजार) तर बहादुरी येथील कृष्णा शिरसाठ (७ लाख ८४ हजार) व चंद्रभान शिरसाठ (१ लाख ७१ हजार) अशी एकूण ३६ लाख रुपयांची फसवणूक केल्याचे उघड झाले आहे.