Chandrpur News : जिल्ह्यातील २५ शेतकऱ्यांना राष्ट्रीय मधुमक्षिकापालन व मध अभियान २०२४-२५ करिता राज्याबाहेरील प्रशिक्षणासाठी जाण्याची संधी कृषी विभागाच्या वतीने उपलब्ध करून देण्यात येणार आहे. या प्रशिक्षणाकरिता शेतकऱ्यांनी अर्ज करावेत, असे आवाहन कृषी विभागाकडून करण्यात आले आहे.

शेतकऱ्यांना राष्ट्रीय मधुमक्षिकापालन व मध अभियानाअंतर्गत जिल्ह्यातील शेतकऱ्यांना राज्याबाहेरील प्रशिक्षणाकरिता हा कार्यक्रम राबविण्यात येत आहे. जिल्ह्यात मधुमक्षिका पालनाला असलेले महत्त्व लक्षात घेता मधमाश्‍या वनस्पतीच्या परगीकरणात महत्त्वाची भूमिका बजावतात. त्यामुळे पिकांच्या उत्पादनात वाढ होते.

मधाचे आयुर्वेदिक अनेक फायदे आहेत. उत्पन्न आणि रोजगारनिर्मिती, शेतकरी आणि बिगर शेतकरी कुटुंबांच्या चरितार्थाला हातभार, फलोत्पादनाचे उत्पादन वाढवणे, यासाठी मधुमक्षिकापालन उद्योगामुळे मदत होते. त्यामुळे मधुमक्षिकापालन काळाची गरज आहे.

या प्रशिक्षणासाठी सहभाग घेण्यास जे शेतकरी, मधुमक्षिकापालक मधुमक्षिका पालनात स्वारस्य दाखवतील तसेच अनुसूचित जाती, अनूसूचित जमाती आणि महिलांना प्रथम प्राधान्य देण्यात येईल. प्रशिक्षणाचा कालावधी ७ दिवसांचा राहील.

राज्याबाहेरील प्रशिक्षणासाठी लाभर्थ्यास इंग्रजी अथवा हिंदी भाषेचे ज्ञान असणे गरजेचे आहे. ठरवून दिलेल्या मापदंडापेक्षा जादा लगणारा खर्च लाभार्थी शेतकऱ्यांना स्वत: करावा लागेल. लाभार्थी शक्यतो १८ ते ६५ वयोगटातील असावेत.

प्रशिक्षणाकरिता शेतकऱ्यांनी १८ फेब्रुवारीपर्यंत संबंधित तालुका कृषी अधिकारी यांच्याकडे सात-बारा, ८ अ, आधारकार्ड व छायाचित्रासह अर्ज सादर करावा, असे आवाहन कृषी विभागाच्या वतीने करण्यात आले आहे.