Pune News : पारंपरिक शेतीला पूरक व्यवसाय म्हणून रेशीम शेती करण्याकडे शेतकऱ्यांचा कल सध्या वाढला आहे. शिंगवे (ता. आंबेगाव) येथील २३ शेतकऱ्यांनी चार वर्षात ५० एकरावर रेशीम शेती यशस्वीरीत्या फुलवली आहे. रेशीम कोषाला सरासरी प्रतिकिलो ५०० रुपये दर मिळाल्याने शेतकऱ्यांना चांगला नफा मिळत आहे.

शिंगवे येथील शेतकरी संतोष गोरडे व रवी कासार हे रेशीम शेतीचा व्यवसाय अनेक वर्षांपासून करत आहे इतर सात शेतकऱ्यांनी त्यांचा अनुभव पाहून चार वर्षांपूर्वी रेशीम शेतीमधील सर्व बारकावे बाबत अभ्यास केला.

तसेच पुण्याच्या रेशीम संचालनालयातील पुणे जिल्हा रेशीम विकास अधिकारी संजय फुले यांची भेट घेऊन रेशीम उद्योगातील संधी बाजारपेठ जोखीम यावर चर्चा करून रेशीम शेती करण्याचा निर्णय घेतला.

त्यानुसार सात शेतकऱ्यांनी सात एकरावर रेशीम शेती करण्यास सुरुवात केली. त्यामध्ये महेश झोडगे, जितेंद्र पोखरकर, सुनील वाव्हळ, बाळासाहेब वाव्हळ, भगवान वाव्हळ पंढरीनाथ वाव्हळ, संदीप वाव्हळ यांचा समावेश आहे.

प्रत्येकाने प्राथमिक स्वरूपात एक-एक एकरावर शेती करण्यास सुरुवात केली त्यासाठी शेडची उभारणी, लोखंडी रॅक कटिंग साहित्य, शेतीसाठी लागणारा खर्च यासाठी प्रत्येकी पाच लाख रुपये खर्च केला.

शेतकऱ्यांना शासनाचे अनुदान देखील प्राप्त झाले आहे. सात शेतकऱ्यांनी प्रायोगिक तत्त्वावर सुरू केलेली रेशीम शेती यशस्वी झाल्यानंतर शिंगवे येथील २३ शेतकऱ्यांनी रेशीम शेतीला प्राधान्य देत आता ५० एकरावर यशस्वी रेशीम शेती यशस्वी फुलवली जात आहे.

कोषाला मिळतो किलोला ६८५ रुपये दर

शिंगवे गावात सुमारे २३ रेशीम शेतीचे शेड असून सुमारे ५० एकर क्षेत्रावर तुतीची लागवड आहे. सर्व शेतकरी एकत्र रेशीम गोणी भरून बीड येथील कृषी उत्पन्न बाजार समितीमध्ये विक्रीसाठी नेत असल्यामुळे वाहनभाडे खर्चात बचत होते. रेशीम कोषाला सर्वाधिक दर किलोला ६८५ रुपये आणि सर्वांत कमी ४५० रुपये दर बीड बाजार समितीमध्ये मिळाला आहे.