Nagpur News: देशाच्या विविध भागात आढळणाऱ्या जनावरांच्या प्रजातींची विशिष्ट नोंद घेतली जात आहे. महाराष्ट्रात नुकतीच देशातील पंधराव्या वराहाची नोंद करण्यात आली. त्यानुसार आतापर्यंत देशात विविध जनावरांच्या २२९ विशिष्ट प्रजातींच्या शास्त्रीय पद्धतीने नोंदी घेण्यात आल्या आहेत, अशी माहिती राष्ट्रीय आनुवंशिक संशोधन संस्थेच्या सूत्रांनी दिली.

शून्य अवर्णीत जनावरे प्रकल्पाअंतर्गत केंद्र सरकारकडून गॅझेटमध्ये उल्लेख असलेल्या जनावरांच्या प्रजातींना ओळख मिळवून देण्यासाठी प्रयत्न सुरू आहे. कर्नाल (हरियाना) येथील राष्ट्रीय आनुवंशिक संशोधन संस्थेने यासाठी पुढाकार घेतला आहे. अवर्णीत जनावरांना ओळख मिळवून देत त्यांचे संरक्षण आणि संवर्धन करण्याचा उद्देश असल्याची माहिती राष्ट्रीय आनुवंशिक संशोधन संस्थेचे संचालक डॉ. एन.एच. मोहन यांनी दिली.

ते म्हणाले की, राष्ट्रीय प्रकल्पाअंतर्गत वर्षभरात संबंधित प्रजातींबाबत शास्त्रीय माहितीचे संकलन होते. त्याआधारे संबंधित प्रस्ताव त्या भागातील पशू विज्ञान विद्यापीठाद्वारे राज्य शासनाला सादर होतो. त्यानंतर भारतीय कृषी संशोधन परिषदेकडे पाठविला जातो. कर्नाल येथील तज्ज्ञांच्या गटाद्वारे संबंधित जनावराच्या माहितीची खातरजमा केली जाते. जनावरांमधील आनुवंशिक सुधारणेसाठी या माहितीचा उपयोग होणार आहे.

जनावरांच्या प्रजातींची नोंद

गोवंश : ५३

म्हैस : २१

शेळी : ४१

मेंढी : ४६

घोडा : ८

उंट : ९

वराह : १५

गाढव : ४

श्‍वान : ५

याक : २

मिथून : १