Nanded News : कृषी यांत्रिकीकरण उपअभियान योजनेतील शेती अवजारे व कृषी सिंचन सुविधेसाठी शेतकऱ्यांनी अर्ज सादर केले होते. यानुसार निवड झालेल्या शेतकऱ्यांनी अवजारे व सिंचन साहित्य खरेदी केली. परंतु कृषी यांत्रिकीकरण उपअभियान योजनेतील ३९२ शेतकऱ्यांचे दोन कोटी ६८ लाख रुपयांचे अनुदान मागील आठ महिन्यांपासून रखडले आहे.

शासनाने उन्नत शेती समृद्ध शेतकरी अभियान सुरू केले आहे. या अभियानात राष्ट्रीय अन्नसुरक्षा अभियान, राष्ट्रीय गळीत धान्य व तेलताड अभियान, कृषी यांत्रिकीकरण उपअभियान व राष्ट्रीय कृषी विकास योजनेतून शेतकऱ्यांनी पेरणीयंत्र, मळणीयंत्र, रोटावेटर, कल्टीवेटर, विद्युत मोटार, पाईप, यांसह अन्य अवजारे आणि ट्रॅक्टरसाठी अनुदान दिले जाते.

मागील वर्षी जिल्ह्यातील शेतकऱ्यांनी कृषी यांत्रिकीकरण अभियानातून विविध कृषी अवजारे तसेच कृषी सिंचन सुविधेसाठी अर्ज केले होते. यात निवड झालेल्या शेतकऱ्यांनी अवजारांची खरेदीही केली. परंतु या ३९२ शेतकऱ्यांचे दोन कोटी ६८ लाख रुपयांचे अनुदान मागील सात ते आठ महिन्यापासून रखडले आहे. यामुळे शेतकरी कृषी कार्यालयाकडे खेटे मारत आहेत.

याबाबत कृषी विभागाकडे याविषयी विचारणा केली असता शासनाकडून अनुदानाची रक्कम जमा झाली नसल्याचे सांगण्यात येत असल्याचे शेतकऱ्यांचे म्हणणे आहे. अवजारे खरेदी केल्यानंतर त्याचा शेतीकामासाठी उपयोग केला जातो.

परंतु अनुदान वेळेत मिळाले नाही तर अशा अवजारांना अनुदानासाठी अडचणी निर्माण होतात. यामुळे शासनाने वेळेवर अनुदानाची रक्कम शेतकऱ्यांच्या खात्यावर जमा करावी, अशी मागणी होत आहे.