ॲग्रोवन वृत्तसेवा
Buldana News : बुलडाणा : वर्षानुवर्षे प्रकल्पांमध्ये गाळ साचल्याने पाणी पातळीत घट झालेली आहे. अशा स्थितीत प्रकल्पातील गाळ काढून जलसाठा वाढविण्याच्या दृष्टीने प्रयत्न सुरू आहेत. या वर्षी जिल्ह्यातील १७७ जलाशये गाळमुक्त करण्याचा उपक्रम प्रशासनाने हातात घेतला असून, शेतकऱ्यांना यातील गाळ मोफत मिळणार आहे. जिल्हा परिषदेच्या जलसंधारण आणि राज्य शासनाच्या मृद्‍ व जलसंधारण विभागाच्या मालकीच्या १७७ जलाशयांमधील गाळ काढण्याची मोहीम सुरू झाली आहे. स्वयंसेवी संस्थांच्या पुढाकारातून हा गाळ काढण्यात येत आहे. शेतामध्ये गाळ टाकल्याने जमिनीची सुपीकता वाढण्यास मदत होते. यासाठी शेतकऱ्यांना गाळ मोफत उपलब्ध करून दिला जाणार आहे. शेतकऱ्यांना गाळ काढण्यासाठी कोणत्याही यंत्रणेला शुल्क देण्याची गरज नाही. हा गाळ शेतीच्या उपयोगासाठी मोफत उपलब्ध असणार आहे.

‘गाळमुक्त धरण, गाळयुक्त शिवार’ हा उपक्रम ग्रामपंचायतीसह शेतीसाठी उपयुक्त आहे. त्यामुळे गाळ काढण्यासाठी ग्रामपंचायतीने शेतकऱ्यांना प्रोत्साहित केले पाहिजे, असे प्रशासन वारंवार आवाहन करीत आहे. पावसाळा सुरू होण्यासाठी जेमतेम दीड महिन्यांचा कालावधी राहिला आहे. या कालावधीत धरणातील गाळ काढण्याचे प्रशासनापुढे आव्हान आहे. पावसाळ्यात धरणातील गाळ काढता येणे शक्य नसल्याने जलसंधारण विभागाने या कामात अटकाव करू नये, असे निर्देशसुद्धा देण्यात आलेले आहेत. गाळ काढल्यामुळे तलावातील पाणी साठवण क्षमता वाढणार आहे.

शेतकऱ्यांसाठी धरणातील गाळ मोफत ः
‘गाळमुक्त धरण, गाळयुक्त शिवार’ हा उपक्रम राबवला जात आहे. याद्वारे शेतकऱ्यांना धरणातील गाळ मोफत घेऊन जाण्याची परवानगी देण्यात आली आहे. शेतकऱ्यांना गाळ काढणे आणि शेतापर्यंत वाहतूक करण्याचा खर्च उचलावा लागणार आहे. यासाठी शेतकऱ्यांनी पुढाकार घ्यावा.
-डॉ. किरण पाटील, जिल्हाधिकारी, बुलडाणा